Footer

BANNER: Umuna a dua a bulan ti 2013: 193 krimen, napasamak iti I. Sur – PPO report

VIGAN CITY – Agdagup iti sangagasut, siam a pulo ket tallo a krimen ti napasamak iti Ilocos Sur manipud Enero 1-Pebrero 28, 2013, nangatngato iti 4.04% no ikumpara iti 130 a krimen a napasamak iti kastoy met laeng a paset ti tawen 2012, segun iti presentasion ti PNP Provincial Office bayat ti Provincial Peace and Order Council meeting a naangay iti Baluarte ditoy siudad idi Marso 7.

Ngem nupay ngimmato iti 4.64% ti average monthly crime rate manipud iti 9.4 iti 14.04, ngimmato met ti crime efficiency solution iti .25% kas ipakita ti 74.09% a ngimmatuanna ita a tawen manipud iti 73.84% itay napan a tawen, inreport pay ni Police Senior Supt. Dennis Basngi, OIC PPO director ti Ilocos Sur iti miting nga inatenderan da Gov. Luis “Chavit” Singson, Vice Gov. Deogracias Victor Savellano, dagiti mamayor ken dadduma pay a maseknan a sektor.

Iti reportna, kinuna ni Basngi a napasamak iti Vigan City ti kaadduan nga index crime nga agdagup iti 7 idinto a kaadduan ti napasamak a non-index crimes iti Candon City nga agdagup iti 90.

Iti kadagupan a 15 nga insidente ti pammaltog iti probinsia, 4 ti naisayangkat iti Vigan City.

Kinuna ni Basngi a lima nga ili a pakairamanan ti Magsingal, Tagudin, Cabugao, Sinait ken Sta. Catalina ti ibilang ti kapolisan nga areas of concern. Nupay kasta, awan pay ti nairekordda a krimen nga adda pakainaiganna iti politika.

Segun pay iti report, 73 a wanted persons ti natiliw ken 4 ti simmuko.

Mainaig iti kampania maikontra iti droga, nangisayangkat ti PNP iti 4 nga operasion a nakaarestaran ti 4 a tattao ken nakakumpiskaanda iti 0.30 a gramo ti shabu; 172,545 a fully grown a marihuana; 7,002.22 a gramo ti napagango a bulong ti marihuana; 263,280 a seedlings , ken 500 a gramo ti bukel ti marihuana nga agbalor amin iti P45,421,300.

Napuoran dagitoy idi Pebrero 18 iti imatang ti publiko.

Mainaig pay laeng iti illegal a droga, nakaisayangkaten ti PNP iti 68 nga anti-illegal drug awareness information dissemination a nakipartisiparan ti 2,060 nga umili.

Kinuna ni Basngi a nupay awan pay ti nariknada a garaw dagiti makannigid a grupo, adda posibilidad nga agdawat dagitoy bayat ti kangitingitan ti panagkampania ket imballaagna iti saan a panangted dagiti kandidato kadakuada.

Indagadag pay ti director a lapdan koma dagiti kandidato ti agririnnikiar tapno masigurado ti natalna nga eleksion ditoy probinsia. (Karaman ti report ni Mancielito S. Tacadena)

 

Comments are closed.