Footer

4 menor de edad, nagtakaw iti kalding

SAN JUAN, Ilocos Sur – Uppat a menor de edad ti nasukalan a nagtakaw iti kalding iti tsekpoint nga inwayat dagiti polis ditoy nga ili idi agsapa ti Marso 14.

Segun iti report, pinasardeng dagiti polis ti kurongkurong a nagluganan dagiti suspek (saan a nailanad ti pudno a naganda agsipud ta agpapadada amin a menor de edad) ket ditoy a naduktalanda nga adda kargana a kalding.

Impan dagiti polis dagiti suspek, agpapada a taga-Barangay Pug-os, Sinait, iti police station idi nagpudno dagitoy a  tinakawda ti kalding iti Barangay Baliw, Sinait.

Nailusot dagiti suspek ti kalding iti checkpoint ti Sinait ken iti Cabugao, ngem saanda a nakalisi iti checkpoint ditoy nga ili.

Naammuan a saanen a nagdarum pay ti akinkukua iti kalding kalpasan a dimmawat dagiti nagannak ken dagiti suspek iti pammakawan kenkuana.#