Footer

BANNER NEWS: Epekto ti sin tax law iti industria ti tabako, saan a nadagsen: NTA Administrator

NARVACAN, Ilocos Sur – Segun iti hepe ti National Tobacco Administration, nupay naiyimplementaren ti sin tax law a nayon a buis iti sigarilio ken arak, saan unay a kas iti napagamkan a kadagsen ti epektona iti industria ti tabako.

Kinuna ni NTA Administrator  Edgardo Zaragoza a saan a napasamak daytoy maigapu kadagiti nadumaduma nga addang nga insayangkatda a nakatulongan kadagiti mannalon ti tabako.

“… saan a marikna ti epekto ti sin tax law iti produksion (ti tabako) ta dakkel ti export,” kinuna ni Zaragoza.

Innayon ti opisial a dakkel ti kasapulan a tabako iti lokal a market ket nupay bumaba man ti konsumo iti sigarilio, adda pay umdas a demand tapno magatang amin a produkto ti tabako ditoy lokalidadtayo.

“Dagiti off grades a reject ti adda problemana… agsipud ta gimmiddanen dagiti low-priced a sigarilio iti P12 a kababaan a buis, saanda unayen (agparpartuat) a makaaramid iti nalaka a sigarilio ken saandan unay nga agaramat iti low-priced tobacco leaves,” panangilawlawag ni Zaragoza.

Kinuna ni Zaragoza a nupay magatang dagiti nababa ti klasena a tabako, saanen a kasdiay kangina ti presiona ita ta saanen unay a kasapulan.

Nupay kasta, kinuna ni Zaragoza nga “iti pakabuklan, makitkitami nga amin a tabako itoy a tawen ket magatang.”

Kinuna ti administrador a saan a bimmaba ti produksion ti tabako iti agdama, pimmatas pay ketdi ti produksion idi 2011 nga immabot iti agarup 80 a million a kilos, maikumpara idi 2012 a gapu iti tudo ken sakit ket immabot laeng iti 70 million a kilos.

“…Panagkunak, saan met unay a naapektaran ti industria iti pannakayimplementar ti nayon nga excise taxes,” kinuna ni Zaragoza idinto nga innayonna a “bareng no di unay maapektaran ti presio.”

Segun iti NTA official, iti agdama, dagiti nangatngato ti nikotinana a tabako wenno tay full-flavoured type a tabako ti kasapulan iti international market ket daytoy ti turong ita ti NTA,  ti panangipaayna kadagiti irrigation facilities tapno ngumato ti produksion kadagitoy nangruna iti birhinia.

Naammuan pay ken ni Zaragoza a maysa pay a mangap-apekto iti presio ti tabako iti international market ti panagpababa ti presio daytoy a produkto iti dadduma a pagilian kas ti India ken ti panagpababa ti balor ti doliar kontra iti peso.

Kinuna ni Zaragoza a bimmaba iti 10 porsiento ti proceeds iti paglakuan ti private sector iti export.

Nupay kasta, kinuna ti opisial a naalana ti commitment ti private sector a gatangenda amin dagiti produkto a tabako iti daytoy a season.

Kinuna ni Zaragoza a masurot latta ti floor price ti tabako, malaksid dagiti insentibo nga it-ited dagiti traders.

Idi napan a tawen, immabot ti presio ti tabako iti P76-78, saan a nababbaba iti P40 kada kilo ti usable reject ngem nababbaban ti presio dagiti ngumisit ken bumerde a reject. (Manipud iti report ni Danny Antalan)

Comments are closed.