Footer

Kutsilio, nakumpiska iti ikut ti motorista

CANDON CITY – Agproblema la ketdi daytoy a motorista gapu iti dina pangitaltalek iti paglintegan a maiparit ti agikuyog iti patadem bayat ti implementasion ti Comelec gun ban.

Naimbitaran ni Raymund Nacion, 28, residente iti Barangay Lingsat, Sta. Maria, Ilocos Sur iti kuerpo ti polis ditoy kalpasan a nakasukain dagiti polis iti maysa a kutsilio  iti motorsiklona bayat ti panag-checkpoint dagitoy iti sanguanan ti tiendaan publiko ditoy idi agarup alas dos ti parbangon ti Marso 13.

Pinasardeng dagiti polis ti TMX motorcycle a nagluganan ni Nacion iti checkpoint agsipud ta awan ti helmetna.

Nakita dagiti polis ti kutsilio nga agatiddog iti 11 a pulgada a naiseksek iti sanguanan ti motorsiklo.

Nainget nga ipakpakat dagiti polis ditoy ti ordinansa a “no helmet, no travel” policy a pakamultaan dagiti aglabsing.#