Footer

Nakainom a lalaki, naikras ti motorsiklona

VIGAN CITY – Naikras ti motorsiklo ti maysa a lalaki bayat ti panaggawidna sadiay Barangay Rugsuanan ditoy siudad idi rabii ti Marso 15.

Nagsagrap iti dunor iti nadumaduma a paset ti bagi ni Expedito Romano Biernes, 22, baro, ken residente iti Barangay Caparacadan, Coayan, Ilocos Sur, kalpasan a naikras ti naglugananna a motorsiklo idi agarup alas 10:30 ti rabii ti nadakamat a petsa.

Segun iti panagimbestiga dagiti polis, agpadaya a direksion ni Biernes ket bayat ti panagdaliasatna iti kalsada a sumalpot iti Barangay Rugsuanan, dina nakontrol ti manibela ti Suzuki a motorsiklona a puon ti nakaikrasanna.

Mapapati a nakainom ti biktima idi mapasamak ti aksidente a nakadadaelan ti speedometer, foot rest ken headlight ti motorsiklo.#