Footer

Pakawanem Ida Ta Dida Ammo Ti Ar-aramidenda…

    Salaysay ni Jobert M. Pacnis

   (Umuna iti dua a paset)

 

SEMANA SANTA. Panawen a panangarisittayo iti kinataotayo a kas Kristiano.

Mabalin a saludsodentayo iti bagitayo: adda kadin naaramidko a pagimbagan ti padak a tao? Wenno nagbalinak laeng a dadagsen dagiti adda iti aglawlawko? Makaay-ayoak ngata iti imatang ti Dios wenno nagbalinak a rinet iti panagkitana?

Panawen met daytoy a panagsangpet dagiti kalugarantayo, tapno uray kaskasano, makapagaliwaksayda.Wenno makainnabrasa, makainniliwda dagiti kabagianda a nayadayo kadakuada iti nabayag a panawen gapu iti nadumaduma a rason—a kaaduanna a trabaho.

Pudno la unay a daytoy panawen ti Kuaresma, maysa kadagiti kararangaan a parambak iti biag ni Kristiano. Ipaduyakyak daytoy ti sakripisio ni Kristo Hesus tapno masubbottayo kadagiti basbasoltayo. Insagutna ti biagna para kadatayo. Nalawag a pammasingked no kasano ti panagayat ti Dios kadatayo—ta mismo a ti bugbugtong nga anakna ti nagtutuok, natay gapu kadatayo a managbasol.

Anian a panagayat!

Awanen ti makaartap pay!

Reprep ti makimisa iti aldaw ti Domingo Ramos pay laeng. Makita ditoy nga iggem ti tunggal maysa ti ramosna (nadisenio a bulbulong a kaaduan ti niog) tapno mabendisaran dagitoy sakbay ken kalpasan ti misa.

Marugian ti selebrasion kadayta a Domingo ti naindramaan a pannakaiparang ti nainballigian nga iseserrek ni Apo Jesus idiay Jerusalem . Ngem kinapudnona, pormal a marugian ti semana iti Mierkoles Kurkurus.

Inyaplag dagiti adu a tattao dagiti kagayda iti kalsada. Nagsep-ak met dagiti dadduma kadagiti sangsanga ti kaykayo nga inyaplagda iti dalan. “Madaydayaw ti Anak ni David!” impukpukkaw dagiti tattao a magmagna iti sanguanan ni Jesus ken dagiti sumursurot Kenkuana. “Bendisionan koma ti Dios ti umay iti nagan ti Apo! Madaydayaw koma ti Dios! (Mateo 21: 8-9).

Kadagiti simbaan, maar-aramid daytoy sakbay ti misa iti Domingo Ramos. Nakarikep ti simbaan a sangbayan dagiti tao. Mayaplag ken maiwagis dagiti ramos iti pagnaan ni Apo Padi a nakasakay iti nuang (asno ti nagsakayan ni Apo Jesus a simrek iti Jerusalem ) iti panagturongna iti ridaw ti simbaan. Idinto a maikankanta dagiti pagdaydayaw iti Dios. Kabayatan ti pampannagna ti nuang (ti kaasitgan nga ayup iti biagtayo nga Ilokano), bendisionan met ni Apo Padi dagiti malabsanna a ramos. Agingga a makagteng iti ridaw ti simbaan. Agtuktok. Aglukat ti simbaan iti maikatlo a pannakatugtogna. Maysamaysa mettern kadagiti makimisa ti sumrek nga agkankanta iti pagdaydayaw iti Dios.

Dagitoy a ramos, paseten ti kulturatayo. Dakkel ti pammatitayo nga anib dagitoy kadagiti dakes nga espiritu ken kadagiti didigra. Maisaluket dagitoy kadagiti balbalaytayo. No adda nakadaldalapus wenno linuganan ti demonio, mausar dagitoy a pangbugiaw. Mapuoran a mailaok iti insenso wenno kamaniang.

Malagipko ti maysa a pasadas ti biagko. Idi kairutko nga agpaagas kadagiti albulario gapu iti di mailawlawag a nasakitko (ta  nagpakitaakon kadagiti doktor ngem diak met laengen agimbag), nayadbays ti panagsuobko iti sakbay ti alas sais ti malem. Buklen ti suobak dagiti ramos, insenso, kamaniang ken dutdot ti manok. Nakaang-anglem ti uneg ti balay ngem inan-anusak tapno laeng “mapagtalaw” ti dakes nga espiritu a “mangbambantay” kano kaniak.

No isu ti nakapalag-anak, diak masinunuo ta nupay insubmitarko ti bagik iti albulario, diak met latta nangliwat a nagpakita iti doktor. Ken kangrunaan ti amin, ti nagkiddaw iti tulong, bendision ken kaasi ti Namarsua.

Agtultuloy ti pannakapusek dagiti simbaan iti Lunes, Martes, Mierkules ken Huwebes Santo gapu iti agtultuloy a selebrasion ti Semana. Ngem ad-addan no madanon ti Biernes Santo. Ditoy ngamin a maiparang no kasano ti pannakaidaton ni Apo Hesukristo iti Bantay Kalbario a nakagsatan ti angesna iti agarup alas tres iti malem.

(Adda tuloyna)