Footer

Suspek iti pammaltog, nakasuan

LAOAG CITY – Nabigbigen ti suspek a nangpaltog iti mayor ti Marcos, Ilocos Norte a mapapati a kameng ti gun for hire group, segun iti kapolisan ditoy.

Binigbig ni Marcos Mayor Salvador Pillos ti suspek a nangpaltog kenkuana a maysa a Jofel Rezon, taga-Turod Patac, Cabugao, Ilocos Sur,  kameng ti Cinco Group, matangdanan a pumatay a grupo, a mapapati a nakabase iti Ilocos Sur.

Sumagmamano pay a testigo ti nangitudo iti suspek a nangpaltog ken ni Pillos iti sango ti Marcos Agro-Industrial School idi Pebrero 4.

Iti panagimbestiga dagiti polis, nagsardeng ti motorsiklo a nagluganan ti suspek ken maysa a di pay nabigbig a kaduana iti asideg ti yan ti mayor bayat ti panaginspeksion daytoy iti maysa a proyektona ti konstruksion, dimsaag ti suspek, inasitganna ti biktima sana pinaltogan.

Nupay kasta, nakataray ni Pillos sakbay a napaltogan ket nagpaarayat kadagiti trabahador iti konstruksion.

Naglibas dagiti suspek ket narekobre dagiti nagresponde a polis ti naglugananda a motorsiklo sumagmamano a kilometro manipud iti nakapasamakan ti pammaltog.

Nagsagrap ni Pillos iti sugat iti sakana ken imana.

Natuntonan dagiti polis ti motorsiklo nga inaramat dagiti nanggandat iti biag ti mayor a nairehistro iti maysa a Joseph Siazon, residente iti Barangay Bayocboc, San Vicente, Ilocos Sur.

Agpailayon ni Pillos a para mayor iti Marcos ket kasangona ni Arsenio Agustin, maysa a negosiante a damona ti tumapog iti politika.

Kitkitaen dagiti polis ti politika a motibo ti pammaltog.#

Comments are closed.