Footer

Tawid ti Kaputotan: Kaimasan Latta

Ni Errol L. Abrew

 

Madanagan ni Don Procopio Mendoza, ti akinkukua ken  Chairman of the Board iti Nag-ilian Basi Inc. ta bassiten ti nabati nga aplikante para connoisseur wenno eksperto nga agraman iti arak ngem awan met laengen makapasa iti checkpoint.

Mapan san a nasurok a dua gasut dagiti immay a nangpadas no pumasada met laeng a connoisseur.  Adda pay nasurok a maysa a dosena a ganggannaet. Ngem awan pay ti makitami a nalaing nga agraman iti arak.

Itay ngamin nabiit, pimmusay ni Don Timoteo, ti kakaisuna a  nabati a kabsat ni Don Procopio ken maymaysa ken kakaisuna a connoisseur wenno eksperto iti panagraman iti arak.

Imbilin ni Don Procopio ti panang-recruitmi iti sumaruno a connoisseur iti basi ken suka agsipud ta awan met kadagiti pinutotda ken daydi Angkel Timoteng ti nakatawid iti kasdiay a galad ti dila ken agongna.

Nagbalinen a sibibiag a pasintawi iti lubong ti panagaramidan iti arak ni Angkel Timoteng. Isu ti maymaysa ken kakaisuna a Filipino ken Ilokano a nangibuddak iti mapa ti pagilian iti lubong ti ilimi a Nag-ilian, agdinamag a paggappuan ti kaiimasan a basi iti intero a lubong.

Awanen ti makaatiw pay iti panagkunak no panagramanan iti suka-bennal ni Angkel Timoteng.  Wenno uray pay ketdi ania a klase ti suka. Ramanan daydi Dios-aluadna nga Angkel Timoteng dagidiay, sakbay a gatangen dagiti komersiante.

No adda maala, pagbalinentayo a dagus a Vice-President for Operations, karanggom metten kas Vice-President for Marketing, kinuna pay ni Don Procopio.

Ngem anian ta iti nagmalem, awan ti makitami a kas kalaing ni Angkel Timoteng nga agraman iti arak.

Malpas kam’ koman nga awan a pulos ti naala idi adda anabaab iti ruar. Rimmuarkam’ ken ti akinkukua.

Madama a karirriri ti guardia ti nadulpet, barbasan ken madlaw a bartekero nga agtawen ngata iti tallupulo ket lima.  Nairupaak, ta adda pay met la agminar a taerna.  Ni Magno!  Valedictorianmi idi hayskul.  De-campanilla nga abugado idi idiay Amerika ngem tinalawan kano ti Amerkana nga asawana.  Isut’ nangrugianna nga agbartek.

Ali, awan met mapukawtayo, nakuna ti akinkukua ket sineniasannak a paunegenmi.  Sineniasak met ti sekretariak a tumimpla iti arak.  Ngem sakbay a ramanan ni Magno, binedbedan ti sekretariak iti dakkel a panio dagiti matana.  Ta agong ken dila laeng ti masapul nga aramatenna iti daytoy a pannubok.  Napusek iti empleado ti kuarto ta retiramin.

Awan as-asinna, inikkanmi ni Magno iti ramananna.

Basi Binalonan, kataltalonan abay highway, medio pumait, adu unay samakna, dinardarasna a kinuna.

Korek! nakunak.

Inikkanmi manen.  Suka.  Imbatogna ti baso iti agongna sana intangad.

Suka Luna, Tallaoen-Bungro, lauden highway asideg Balaoan, adda laokna a preservative, medio di unay naalsem.  Plastik nakaaramidanna.

Korek!  Inunaannakon ti akinkukua.

Dikam’ nakuntento,  inikkanmi manen iti basi.  Awan aniamanna nga intaogna.

Basi Piddig, adda laokna a hiniebra ken bugnay, kurang bubodna, di unay naadi.  Burnay nakaikabilanna, ngem makatawen pay laeng.

Apon a mulagatmi amin a nakaimatang.

Ngem madanaganakon. Dakesen no alaenmi daytoy a klasmetko.  Amangan no nangatngatonton ngem siak, nalimed a nakunak.  Awan duadua ta nautek, isuna laeng ta bartek.

Inyawatanmi manen.

Basi Nag-ilian, kunak koma, ngem saanen a kas iti orihinal.  Nabiit pay a natempla.  Awanen daydi sigud a templa, impalnaadna.

Apagdarikmat, gimluong dagiti sipsipat dagiti empleado a nagraem iti aplikante a connoisseur.

Sinenniasannak ti akinkukua nga isun ti alaenmi.  Ngem nagduduaak latta.

Ti maudi a pannubok, naipigsak ket napasardeng dagiti palakpak. Kinermak ti sekretariak.

Simrek iti kuarto. Apagbiit, nagsubli, inyawatna ti iggemna a baso ken ni Magno.

Inangot ti mammartek ti baso.  Ngimmato dagiti kidayna.

Nalpaskan klasmet, nakunak.  Ditam nga umanglem, ditam nga umasuk, sililimed nga ingkantiawko.

Intaogna.  Kalpasanna inikkatna ti abbungotna.  Sana insenias a rummuarkam’ a dua.

Iggemna pay la ti baso,  sinangonak.

Klasmet, Takio, isbo ti ag-duapulo ket innem ti tawenna a balasang daytoy, insungona ti baso sanak pinerreng dagiti kumilaw a matana.

Napaalimonak.  Talaga nga isu ti kalainganen, awan duadua.

Uray la simgar ti merretko iti innayonna: ken tallo a bulanen ti sikogna, ingngirsina.  Ket no dinak pay la alaen a connoisseur, ibagak iti akinkukua no sino ti ama ti sikog ti sekretariam, nalpaskan, impangtana.

Dayta ti gapuna no apay nga agpapan ita, ti Basi Nag-ilian ti nagtalinaed a kaiimasan iti intero a lubong.#

Comments are closed.