Footer

3 babbai, naaksidente iti lugan

STA. CATALINA, Ilocos Sur – Tallo a babbai ti nadunor gapu iti pannakidinnungpar ti motorsikloda iti sabali a lugan sadiay Barangay Cabuloan ditoy nga ili idi malem ti Marso 21.

Naireport a nadunor da Joana Rabuy Guzman, 17, awanan asawa, ken residente iti Barangay Bulala West, Vigan City; Nica May Rabena, 17, residente iti Barangay Manangat, Caoayan; ken ni Sherry Mae Pacheco, 17, awanan asawa, ken residente iti Barangay Sinabaan, Sta. Catalina, Ilocos Sur.

Segun iti inbestigasion, idi agarup 3:00 p.m. idi Marso 21, agpaamianan a direksion ti motorsiklo a minaneho ni Rabuy ken nakilubbonan da Rabena ken Pacheco, ket iti Gomez Street ti nadakamat a Barangay, mapapati a nasabatda ti nagobertek a multicab a minaneho ni Sgt. Joseph Navalta Rapacon, 34, Air Force member a nakadestino idiay Manila, residente iti Floridablanca, Pampanga ngem bakasionista iti nadakamat a barangay, a puon ti nagdinnungparanda.

Gapu iti impact ti panagdinnungparda, naikras ti ti motorsiklo a puon ti nakadunoran dagiti tallo a babbai.

Naitaray dagiti biktima iti Gabriela Silang General Hospital tapno maagasan dagiti sugatda.

Saan a naan-ano ni Navalta ngem naipan iti police station para iti pannakapalutpotna mainaig iti aksidente.#