Footer

4Ps beneficiaries iti Cabugao, inawatda ti pensionda

CABUGAO, Ilocos Sur – Agdagup iti 800 nga agindeg ditoy ti immawat iti pensionda manipud iti Pantawid Pamilyang Pilipino Program (4Ps) iti Cabugao Sports and Cultural Complex  ditoy idi Marso 20.

Kinuna ni Municipal Social Welfare and Development Officer Lydia Gazmen a daytoy pay laeng a bilang dagiti resipiente ti 4Ps ti immawat iti benepisioda para iti bulan ti Enero ken Pebrero manipud iti kadagupan a 1,200 a marigrigat a pamilia nga agindeg ditoy nga ili a nailista a mabenepisiaran iti daytoy a tulong manipud iti national government.

Iti babaen ti 4Ps a maaw-awagan pay iti Conditional Cash Transfer  (CCT) Program, umawat ti household iti P500 tunggal bulan para iti salun-at ken nutrision ken kanayonan a P300 tunggal anak (agpatingga laeng iti tallo), para iti panagbasada.

Kas kondision, agdalan dagiti annakda iti regular a check-up, iyaatendar dagiti nagannak iti responsible parenthood sessions wenno mother’s class ken dadduma pay a seminar mainaig iti salun-at ken iti panagbasa dagiti annakda.

Agpaut daytoy a benepisio iti lima a tawen no la ketdi matungpal dagiti benepisario dagiti kondision ti nasao a programa