Footer

Ania, atanud, tiliwendakan nga ag-Facebook?

Salaysay ni Errol Liquicia Abrew

(Umuna a paset)

 

 

ITAY UMUNA a lawas ti Pebrero, intantan ti Korte Suprema ti pannakayimplementar ti cybercrime law a mangdusa iti pannakabalud ti siasinnoman nga agikabil kadagiti maikaniwas a mai-koreo idiay Twitter, Facebook ken dadduma pay a social networking sites a kunaen dagiti kritiko a panaglabsing iti nainkonstitusionalan a pannakagarantia iti karbengan nga agiyebkas.

“Ti temporario a restraining order (TRO) iti cybercrime a kaso ket maitantan agingga nga ikeddeng ti korte,” kuna ti public information office a nai-text kadagiti taga-media.

“Tungpalenmi ti pangngeddeng ti korte ken respetarenmi ti desision a panangiyatiddog ti TRO,” nakuna ni Sekretario iti Hustisia Lilia de Lima.  “Saan met a kadagupanen daytoy iti pannakaabak.  Maysa laeng a TRO sakbay a matinong ti merito dagiti petision, innayonna.

 

Ti rugina

Kalpasan laeng iti tallo a bulan a pannakaurnos tapno mapagmaymaysa dagiti nadumaduma a bersion, pinirmaan ni Presidente Benigno C. Aquino III ti R.A. 10175 wenno ti Cybercrime Prevention Act (CPA) idi Septiembre 12, 2012.

Gapu ta “ti Estado bigbigenna ti napateg nga akem ti teknolohia iti Komunikasion ken Impormasion” iti sosial ken ekonomiko a pagsayaatan, ti CPA ket panggepna a patalgeden dagitoy a plataporma babaen iti panangsakupna iti annuroten ti linteg manipud iti napaypayso a lubong iti lubong ti makunkunana a cyberworld.  Gapu iti pangipatawna iti dusa kontra iti cyber prostitution, cyber human trafficking, ti CPA ket napaneknekan iti kinasamayna ita a panawen a dagiti kadawyan a krimen ket maar-aramid iti online.”

Ngem dagidiay a merito, iti sabali a bangir, ket silalawag met a liningdan dagiti nadumaduma a kapanunotan kontra iti nasao a linteg a nakuna a nakapuy ti pannakasangalna ken addaan nalibeg a probision ken paset a mangitunda iti pannakatukkol ti wayawaya nga agsao ken dadduma pay a karbengan sibil.

 

Nainsistemaan a lapped

Ti nalatak a reklamo kontra iti CPA ket dagiti probision panggep iti online libel.  Dagiti maseknan nga organisasion imbisikda a ti CPA ket maysa a “palikud nga uddang” iti nabayagen a singasing a pannaka-decriminalize koma ti libelo.

“Dagiti linteg iti libelo iti Filipinas ket nakaro unay no idasig kadagiti dadduma a demokratiko a pagilian, nakuna ni UP law professor Harry Roque, maysa kadagiti mangilunglungalong iti decriminalization ti libel,

Mainaig ditoy, ti United Nations Human Rights Committee (UNHRC) naideklaranan a ti Artikulo 355 iti Revised Penal Code a mamagkriminal ti libelo ket “dida agkatunosan iti Artikulo 19 it makunkuna nga “International Covenant on Political and Civil Rights.”

Naduktalan ti UNHRC a dagiti linteg iti libelo iti Filipinas ket makatubeng iti sibil ken intelektual a panagdidiskutir, nakuna pay ni Roque.

Kasta met a dagiti saan a nalawag a probision  “mangipakita a ti cyberlaw ket saan a pamiliar a teritorio dagiti mammanday ket makuna a ti CPA ket naipapilit,” innayon pay ni Roque.

Makita met a ti kaadu dagiti simmuppiat ken nagprotesta kontra iti nasao a linteg nalawag nga inunaanna pay dagiti mas prayoridad a linteg kas koma kadagiti Reproductive Health (RH) Bill ken ti Freedom of Information Bill.

 

Nabingay a reaksion

Dagiti senador kas kenni Sen. Peter Alan Cayetano sisisiglatda a nangdepensa kadagiti bagbagida.  Inlawlawagda a dagiti kontra iti CPA nga aksion ket di unay timpuar idi madama ti diskusion.  Nupay kasta, ti panangadmiter ni Sen. Vicente Sotto III iti panangiserrekna iti probision ti online libel ket saan a nadepensaan.

Idi madama ti interpellation ti CPA bill bersion, diniskutir ni Kabataan Partylist Rep. Raymond Palatino a dagiti kangrunaan a probision ti linteg ket addan a linaon dagiti agdama a paglintegan ket singasingna a maamendaranda laengen imbes a mangpanday iti kabarbaro.  Dagidiay a mosion, a pinadasna nga inyetnag, numan pay kasta, saanda a naaklon.

(Adda tuloyna)