Footer

BANNER NEWS: Ilocos Sur, naikkat iti listaan ti Comelec, PNP nga area of concern

VIGAN CITY – Naikkaten ti probinsia ti Ilocos Sur iti listaan ti Commission on Elections ken iti Philippine National Police nga “area of concern” ngem simmukat ti kaparangetna a probinsia ti Ilocos Norte a maysa kadagiti masipsiputan a lugar gapu kadagiti insidente ti pammaltog a mapapati nga adda pakainaiganda iti politika.

Iti kabarbaro a listaan dagiti sangapulo ket lima a lugar a naibilang nga “areas of concern” iti pagilian nga imparuar ti Comelec, saanen a nairaman ti Ilocos Sur ngem simmukat ti Ilocos Norte kas maibase iti panagmonitor ti Philippine National Police ken ti Department of Interior and Local Government iti sapasap a pagilian manipud nangrugi ti election period idi Enero 13.

Malaksid ti Ilocos Norte, karaman dagiti dadduma pay nga “areas of concern” ti Abra, Pangasinan, La Union, Pampanga, Cagayan, Nueva Ecija, Cavite, Batangas, Masbate, Western Samar, Misamis Occidental, Maguindanao, Lanao Del Sur, Basilan, ken Lanao Del Norte.

Iti pannakiuman ti media ken ni Comelec Chairman Sixto Brillantes, kinunana a naitudo dagiti nadakamat a probinsia a kas “areas of concern” bayat ti miting ti Comelec ken dagiti opisial ti PNP ken militar idi Marso 19.

Segun pay ken ni Brillantes, saandan nga aramaten ti balikas a “hotspots” no di ket uppat a tukad ti klasipikasion ti aramatenda, kas iti area of concern, area of immediate concern, area of grave concern, ken area under Comelec control.

Sakbay daytoy, binabalaw dagiti agtuturay ti Ilocos Sur ti pannakairaman ti probinsia kas maysa kadagiti areas of concern iti pagilian.

Kinuna ni Gov. Luis “Chavit” Singson nga “unfair” ti pannakaibilang ti Ilocos Sur a hotspot agsipud ta awan met dagiti kaso ti pammaltog nga adda pannakainaigda iti politika.

Ngem inlawlawag ni PNP Chief Director General Alan Lamadrid Purisima idi bimmisita iti Ilocos Sur a saan a hotspot ti probinsia no di ket maysa a “priority area” iti masungad nga eleksion.

Kinuna ni Purisima a nairaman ti Ilocos Sur a maysa kadagiti 15 a priority area agsipud iti kaadda ti napasamak a kinadamsak nga adda pakainaiganda iti politika iti napalabas, panagraira dagiti loose firearams ken mapapati a kaadda dagiti crime groups nga agdakdakiwas iti probinsia.

Kabayatan,  nairaman ti Ilocos Norte nga “area of concern” kalpasan dagiti nagsaruno nga insidente ti pammaltog iti nasao a probinsia manipud idi nangrugi ti election period.

Idi Pebrero 4, pinaltogan dagiti armado a lallaki a nagkalubbon iti motorsiklo ni Marcos Mayor Salvador Pillos iti sango ti Marcos Agro-Industrial School.

Nalasatan ni Pillos ni patay ta nagsagrap laeng iti sugat iti saka ken imana.

Mapapati a kameng ti gun for hire gang ti suspek a managan Jofel Rezon, taga-Turod Patac, Cabugao, Ilocos Sur.

Idi Pebrero 23, pinaltogan dagiti armado a tattao a riding in tandem ni Alfred Arce, kandidato nga independiente para mayor iti Marcos, Ilocos Norte.#