Footer

EDITORIAL: Semana: Pagsarmingan iti Biag

Hebdomas Sancta wenno Hebdomas Maior iti Latin wenno dagiti nangina nga aldaw. Nadanon manen dagiti aldaw a naisangsangayan iti biag tunggal Kristiano, ti pananglagip iti panagrigrigat, pannakatay ken panagungar ni Hesukristo; a daytoy ti maitutop a pagsarmingan iti biag tapno mailaksid iti pannakaiwawa wenno panagkalkallautang. Rumbeng laeng a pagsarmingan, tuladen ken iyaplay iti panagbiag iti inaldaw-aldaw dagiti pannursuro, kababalin, kabibiag ken kinaasinona idi timmao ditoy daga. Ti pananganninaw kadagitoy a kababalinna, dumteng met iti asinoman ti naan-anay a panagbalbaliw. Dumteng laeng ti panagbalbaliw iti biag ti tao babaen ti siaannugot ken sipupuso a panangsurot ken Kristo Jesus.

Kasano ti panangsurot kenkuana? Babaen ti panagpakawan kadagiti basbasol ket saanen nga uliten wenno sunotan pay ti agaramid iti maikanniwas kadagiti pannursurona, iti maikanniwas iti pagayatan ti pada  a tao, ket agbiag iti nalinteg a dana. Saan laeng a ti bukod a bagi ti kitaen no di ket uray ti sabali, ta kas iti maysa kadagiti pannursurona, ayatem ti bagim a kas panagayatmo iti padam a tao. (Marcos 12:31)

Panawen a pananglagip iti panagrigrigat ken panagtutuok ni Kristo Jesus. Iti daytoy a pananglagip, maaddaan koma iti panawen nga agsubli iti ikub ti ayatna, ken iti ikub ti pammati. Ta iti panagtutuok, pannakaibayogna iti krus, natay ket naitanem, nagungar iti maikatlo nga aldaw.

Iti panamatitayo, maaddaantayonto met iti panagungar kalpasan ti ipapatay nga agturong iti nagkaysa a biag. Daytoy ti misterio a naikalupkop iti kaipapanan no apay nga intay lagipen ti napalabas iti biagtayo ket maaddaantayo iti panawen nga agbalbaliw, ti mangabaruanan, ken mangpasiken ti pammati a kas iti nasiken a pammati dagiti immuna a kaputotantayo.

Tinawen daytoy a panangilagip ken Jesus ken panangpasiken iti pammati. Mapasamak ti panagayuno, a kas met laeng kadagiti dadduma pay a major religions. Ti panagayuno ket paset ti panangpabaro, saan laeng nga iti pisikal a bagi no di pay iti panunot ken kararua. Daytoy ti kaimudingan dagiti nangina nga aldaw a rumbeng a taginayonen babaen ti panangiyadal kadagiti sumarsaruno a kaputotan, ti awan katukadna nga adal iti biag tunggal natudio a Kristiano. (jmajr.)

Comments are closed.