Footer

Illegal a droga, naabandonar iti public market

SANTOL, La Union – Aganay a pito kilos a napagango a bulong ti marihuana ti naabandonar iti tiendaan publiko ditoy itay nabiit.

Taktakuaten pay laeng dagiti polis no asino dagiti nangibati iti illegal a droga iti tiendaan.

Sakbayna, nakaawat ti polis ditoy iti awag a maysa a pampasahero a dyip ti agibiahe iti marihuana.

Nangipasdek dagiti polis iti checkpoint sada pinasardeng ti dyip a minaneho ti maysa a Michael Jones Orina, 25, ken ti konduktorna a maysa a Danny Ernie Sangla, 20, ket sinukimatda ti lugan ngem awan ti nakitada a maiparparit a droga isu a pinalubosanda ti lugan.

Di mabayag, naduktalan ti maysa a utility man ti maysa a sako a naglaon iti napagango a bulong ti marihuana iti tiendaan a mapapati nga imbati dagiti di nabigbig a suspek a posible a nakasaep a naangotan dagiti polis ti ibiaheda a droga.#