Footer

Ilocos Sur, Best Poverty Alleviation Program Implementer iti Region I

VIGAN CITY – Napasubli ti Ilocos Sur ti pammadayaw a kasayaatan a mangipakpakat kadagiti programa a mangpukaw iti kinapanglaw iti sibubukel a rehion kalpasan a pinadayawan ti Regional Development Council a Best Poverty Alleviation Program Implementer iti sibubukel a Rehion 1.

Kinuna ni Ilocos Sur Provincial Social Welfare and Development Officer  Ferdinand Concepcion a nagun-od manen ti probinsia ti nasao a pammadayaw babaen ti KAPITOL Outreach Program ken dadduma pay a programa ti gobierno probinsial a mangitag-ay iti kalidad ti panagbiag dagiti umili ti Ilocos Sur.

Sigud nga inyal-alat ti Ilocos Sur ti nasao a pammadayaw ngem naited iti La Union idi napan a tawen.

Kinuna ni Concepcion a dakkel met a puntos ti naited dagiti dadduma pay a programa ti provincial government, kas iti libre a panagabrod babaen ti opisina ti gobernador, ti pannakaipasdek ti Balay Taripato a salinong dagiti nataengan nga abandonado ken awan pagnaedan, ti Ilocos Sur Hotline a pakaidandanonan dagiti parikut dagiti umili a dagus a maikkan iti tulong wenno pannarabay ken ken ti Community Service nga agiwarwaras iti kangrunaan a kasapulan dagiti amin a residente kadagiti 768 a barangay iti probinsia.

Iti las-ud ti makatawen nakaiwaras ti Community Service kadagiti grocery items, bags para kadagiti ubbing ken pang-noche buena a ham kadagiti amin a barangay idinto a mangipapaay pay daytoy kadagiti impormasion babaen ti aglinawas a panagprogramada iti radio.

Kabayatanna, dua pay nga upland municipalities ti naipaayan iti serbisio babaen ti Kakabsat nga Agnaed iti Probinsia ti Ilocos Sur Idanonmi ti Tulong ken serbisio, aniaman nga Oras dita Lugaryo wenno KAPITOL Outreach Program itay nabiit.

Immuna a sinerbian daytoy nga instrumento para ti poverty alleviation program ti gobierno probinsial iti ili a Sigay idi Marso 11 ket naiyawat dagiti kiniddaw dagiti opisial dagiti pito a barangay ditoy a kasapulanda a pakairamanan ti kuliglig, generators, rice thresher, water pumps, knapsack sprayers, hoses, pipes, kitchen utensils, chairs, laptop, portable sound system, amplifier, LCD projector, laminated sacks, semento ken pinansial a tulong.

Naited met idi Marso 14 dagiti kiddaw a naipalaon kadagiti resolusion dagiti opisial dagiti pito a barangay ti ili a Gregorio del Pilar  a pakaibilangan dagiti hose and pipes, rice thresher, generators, knapsack sprayers, kitchen utensils, sound systems, grass cutters, emergency lights, laminated sacks, chairs  ken barangay aid.

Malaksid dagiti naited a sarukod ken wheelchair dagiti nataengan, naisayangkat pay ti  medical ken dental mission bayat ti KAPITOL Outreach Program. (Karaman ti report ni Mancielito S. Tacadena)