Footer

Mailako a karne ti baboy iti tiendaan publiko, kimmisang

VIGAN CITY – Makalawas sakbay ti Semana Santa, kimmisang ti karne ti baboy a mailaklako iti tiendaan publiko ditoy siudad iti sanguanan ti alegasion dagiti meat vendors nga agkurang ti suplay ti liveweight ditoy probinsia.

Naammuan ti Tawid News nga idi Marso 22, lima laengen nga stalls iti tiendaan publiko ditoy siudad ti pakailaklakuan ti karne ti baboy agsipud ta bassit ti naparti iti slaughterhouse.

Kasta met a tapno saan nga aglugi dagiti meat vendors, saanen a kas iti napalabas a mailasin dagiti tulang, maisurot itan ti tulang iti lasag a mailako iti tiendaan.

Segun ken ni Ramon Chan nga adda puestona iti karnean iti tiendaan, bimmassit dagiti naglako agsipud ta nakisang dagiti maparti a baboy iti slaughterhouse ken gapu ta nangina dagiti magatang a baboy maigapu iti panagkurang ti suplay ti liveweight iti probinsia.

“Nakisang ti magatang a baboy, nupay kuna dagiti hog raisers a supisiente ti suplay,” kinuna ni Chan iti pannakiuman kenkuana ni Jun Ramos a naipatangatang iti DWRS Barangay Commando idi Marso 22.

Kinuna ni Chan a bimmassit dagiti meat vendors nga aglako iti tiendaan agsipud ta narigatda a maganansiaan iti presio daytoy a P160 kada kilo.

Kinuna ni Chan a ti Vigan ti kalakaan iti presio ti baboy iti tiendaan sana dinakamat a P180 kada kilo ti presio ti karne ti baboy iti Narvacan, Cabugao ken dadduma nga ili iti probinsia.

Kanaig daytoy, nangidatag ti gunglo dagiti meat vendors iti petision iti sangguniang panlungsod a nangkiddawanda iti pannakaipangato ti presio ti karne ti baboy.

“No mabalin, uray maipangato la koma ti presio ti karne ti baboy iti P175 kada kilo,” kinuna ni Chan.

Innayon ni Chan a sabali pay a petision ti aramiden ti gungloda a maipatulod iti gobierno probinsial a pangkiddawanda ti pannakaipalubos ti pannakaiserrek dagiti baboy iti quarantine checkpoint sadiay Tagudin nga awan ti bayadan dagiti hog traders.

“Kiddawenmi koma nga awan pay ti bayadan dagiti traders iti quarantine checkpoint sadiay Tagudin agsipud ta ipasada met daytoy kadagiti aggatang iti baboy,” kinuna ni Chan idinto nga inyunay-unayna a maisublinto met laeng daytoy a mabayadan inton agbalin a normal ti suplay ti baboy iti probinsia.

Kapaliiwan a dimmakkel ti demand iti baboy agsipud iti panaggragraduar dagiti agbasa, isusungad ti Semana Santa, ken iti panangrugi ti panagkampania dagiti kandidato para iti masungad nga eleksion inton Mayo.

Idi napan a tawen, nagreklamo dagiti hog raisers nga agpukpukawda gapu ta nalaklaka nga amang dagiti baboy nga ilako dagiti traders nga aggapu manipud kadagiti sabsabali a probinsia.

Nagriri met dagiti aggatgatang iti baboy gapu ta nakisang ti magatangda ket saan a kabaelan dagiti hog raisers nga ited ti bilang dagiti baboy a kasapulan a maparti iti slaughterhouse.

Gapu iti daytoy, imbilin ni Gov. Luis “Chavit” Singson ti pannakaiparit ti iseserrek dagiti oversized a baboy iti probinsia ken inikkanna dagiti hog raisers ken meat vendors iti sag-P1.5 million a pondoda tapno saan a matay ti industria ti baboy iti probinsia.

Maibilang nga oversized ti baboy nga agdagsen iti nasursurok ngem 100 kilos.#

Comments are closed.