Footer

Ni Senador Miriam ken dagiti Kaang-angatna a Boys

Kolum ni Danny Antalan

(Umuna iti dua a paset)

 

Natured.  Nasirib.  Naunget.  Nalaing ag-lecture.  Pick-up lines.  Nalaing nga agpakatawa.  Nadungngo.  Nagaget

Dagitoy man ti panangiladawan dagiti kaadduan ken ni Senadora Miriam Defensor-Santiago.  Babai ngem awan kabutengna.  Ipasaksak ken ipalgakna lattan dagiti kayatna nga ibaga, awan preno no dadduma.  Nangruna ket ngaruden no kadagiti padana nga opisial a nangato met ti saadna iti gobierno a pagduduaanna ti aramidda.

Ngem no kadagiti agtutubo, nalaing nga agpakatawa:  simmikat ti pick-up lines gapu kenkuana.  Nasiglat pay a mangipauso kadagiti balikas.

‘Wha!’  Daytoy ti maysa a pinasikatna bayat ti impeachment trial ken ni sigud a chief justice Reynato Corona.

Ngem ita, umado dagiti kaangatna, kaadduan kadakuada ti makuna pay met a natutured saan laeng iti sarita, no di ket uray pay iti langa ken aramid.

Senador Ping Lacson, Senate President Juan Ponce Enrile,  Governor Chavit Singson, 8th Division Boxing champ Manny Pacquiao,  Atty. Vitaliano Aguirre… asino pay aya dagiti dadduma pay a kinaapana.  Adudan sa metten.

 

MIRIAM VS PINKY

Agasem, pirmi kano ti punger ni Ping Lacson ta inawaganna metten iti Pinky Lacson, adda pay ‘hi hi hi’ na.  Pirmi kano ti pungerna ta dina kayat ti Pinky, Panfy kano ti kayatna, je je.

Kasano ngata no nagriri ni Miriam ken ni Pnoy, ania ngata met ti iyawagna kaniana, nakup…

Ngem aguray, ta nangrugi met ti riri dagitoy dua gapu ngarud iti panangikalintegan ni Senador Ping ken ni Senate President Juan Ponce Enrile mainaig iti di agpapada a cash gift kadakuada a senador. Inawaganna ti senadora iti ‘crusading crook’ ken lunatic.

Rimmuar ti isyo iti panangaramat ti senadora iti pork barrelna a mangipatakder iti pagpallotan nga imbaskagna nga sports complex.  Imbagana pay nga inaramatna ti pondo ti Senado a pas pangabang iti extension office ni Senador Miriam iti pasdek a kukuana met laeng.

Imbaga met ti senadora nga agsagana daytoy, ta iti panagleppas ti terminona, umado ti pabettakenna, ket saanna pagbalsen daytoy gapu ta adda immunityna iti kaso.

 

MIRIAM VS MANONG JOHNNY

Addan panagpingki dagiti balikasda ken ni Senate President Juan Ponce Enrile kadagiti napalabas, ngem daytoy kaudian ti maysa kadagiti kabaraan manen ta ramaramenna uray dagiti napalabas nga isyu tunggal maysa kadakuada.

Ti kaudian ket simgiab mainaig iti kontrobersial a Christmas gift nga inted ni Manong Johnny kadagiti senador.  Ti dakesna ket saan agpapada ti regalona kadakuada, uppat ti kunada a saanna a paborito ti immawat laeng iti P250,000 kabayatanna a dagiti kabaddungalanna ti immawat ti P1.6 milion tunggal maysa.

Nagpauyo ket ngarud dagiti uppat.  Normal.  Siempre basbassit ngamin ti inawatda.  Agasem met ngamin ti diperensia.  Ti pondo ket naggapu iti savings ti operating expenses ti senado.

Insubli ti senadora ti kuarta, pinasurotanna iti nagkaadu a banat ken ni Manong Johnny.  Inramanna ti akemna kano kas martial law administrator idi panawen ni Presidente Ferdinand Marcos ken panangpundona ti kudeta kontra ken ni                                                                                                                sigud a presidente Cory Aquino, ken panangakusarna a plunder daytoy nga inaramidna.  Ken apay a kasta la unay ti kinabaknangna?

Di met nagaripapa ni Manong Johnny a nangsungbat, siempre, imbagana a ni Senador Miriam mismo ket asideg iti Marcos agsipud ta nagtrabaho daytoy ken ni sigud nga ambassador Kokoy Romualdez a kabsat ni sigud a first lady Imelda Marcos, isu nga isuna ti masapul a mangipalawag iti kinabaknangna met.

Pinaglibakanna met ti isyo ti panangpadisina ken ni sigud a presidente Cory Aquino agsipud ta inimbestigaranda isuna idi ket nadalus met ti naganna.

(Adda tuloyna)