Footer

Pakawanem Ida Ta Dida Ammo Ti Ar-aramidenda…

Salaysay ni Jobert M. Pacnis

   (Maudi iti dua a paset)

 

Mailawlawag ditoy dagiti Maudi a Pito a Balikas ni Hesus idi addan nga agngangabit ken ni Patay. Sumnek iti puso ti pannakailawlawag ti tunggal balikas. Mapabaro ti pampanunot a kupikopna iti papananna manen a disso a pakigasanggasatanna kalpasan ti selebrasion. Daytoy a pannakapabaro, agserbi a kasla pigsana a sumaranget kadagiti sumangbay a karit, pannubok iti biagna.

Iti met kabigatanna, Sabado de Gloria, madlaw ti kinaulimek ti simbaan. Dagiti tattao? Addada kadagiti igid ti baybay wenno karayan nga agraragsak/agpipiknik/agre-reunion.

Agraragsak? Wen, ta iti kano kabigatanna, nagungaren ni Hesukristo ket nasubboten dagiti basbasol. Pasamak a rumbeng a rambakan. Dagiti dadduma, al-alaenda met daytoy a gundaway tapno makapagiinniliw kadagiti kameng ti pamiliada a nagiinnaddayo gapu kadagiti nagduduma a rason.

Ala, nasayaat met nga agpayso a rambakan ti panagungar ti Mesias. Ta ipakita laeng daytoy ti di maipeksa a panagyaman iti pannakasubbot dagiti basbasol.

Ngem kas mapalpaliiw ‘toy nagsurat, daytoy a panagraragsak, addada met ibungana a nakaal-alas a pasamak. Gapu ta kadawyan nga agiinum dagiti agraragsak iti igid ti baybay, aduda ti agkikinnursunada. Inton kuan, rambolen. Naimbag laeng no awan ti marissing a biag!

Ditoy ilimi, reprep dagiti mapan agpipiknik ken agdidigos ti igid ti baybay no kasta a Sabado de Gloria. No palausen ti manarita, arig awan pagpuestuam iti kaadu ti tao. Nataratar dayta manipud aplaya ti sentro nga agpadaya (a masakupan ti Brgy. Sta. Cruz, Ammubuan ken Palloc) ken agpalaud (a masakupan ti Brgy. Centro West, Cabuluan East/West ken Cabaritan East/West).

Ta adu dagiti naggapu iti kabangibang nga ili ti um-umay! Pati dagiti taga-Apayao iti abagatan ti ilimi.

Di mailadawan a ragragsak ti maimatangan.

Kalpasan ti piknik, ragragsak, ania ti sumaruno?

Kas nasaon, nagasaten no awan ti nagkikinnursunada. Ken naimbag la unayen no awan ti “innala” ti baybay. Wen, paseten ti pannakarambak ti Sabado de Gloria ditoy ilimi ti kinapudno nga adda dagiti “al-alaen” ti baybay. Daton kano. Nasirenada, kuna dagiti dadduma. Ta no kitaen kano, pagattumeng wenno pagatsiket laeng ti nakalmesan ti “naala.”

Ngem saan ngata a biktimada laeng ti sobra a pannakaulawda iti nasanger? Ta pamrayan dagiti dadduma ti mapan agpausaw nga aglangoy iti baybay no kasta a simmiluden ti ininumda. Ket dimmuko ti haybladda!

No saan, di ngata a pagbayad ti tao iti ar-aramidenna iti nakaparsuaan?

Apay?

Kalpasan ngamin ti agmalem a ragragsak, iti ibibisitam iti igid ti baybay iti kabigatanna kalpasan ti misa, maimatangam laengen dagiti maitaytayab, agkaraiwara a basura a kas iti plastik, bote, pappapel ken no ania la ditan.

Ti dakesna pay, kaaduan kadagiti bote ti nabtak. Gapu ta kadaratan, magaburan dagitoy iti apagapaman. Samonto laengen ammo nga adda bote no nabaddekamon. Nabiktimakan iti aramid dagiti kailian ken uray dagiti ganggannaet a nagraragsak!

Koma, kitaen ti tunggal maysa ti akem/obligasionna iti nakaparsuaan. Saan a gapu ta panawan met laeng ti lugar (a sublian kalpasan ti makatawen), makaammo ditan no adda masarming kadagiti naginuman. Total, nadalusto man met laengen a sangbayan ta dalusan ti baybay babaen ti pananggaborna kadagitoy.

Daytoy koma ti rumbeng a “mapabaro” nga ugali ti tunggal maysa. Agbalin koma a responsible ti amin iti pannakatagiben ti nakaparsuaan. Akupenna koma ti bukodna a wara wenno basura.

Ta iti panagsublina iti sumaruno a tawen, adda pay laeng dayta kayaw ti baybay a pagrambakanna, pagpanunotanna a siuulimek kadagiti pasamak iti biagna.

Ta narigat ti agbalin a biktima iti bukod nga aramid!

Biagen koma iti puso ken isip dagiti pannursuro ti Dios. Ta di kunaen ni Apo Hesus: Pakawanem ida ta dida ammo ti ar-aramidenda…#