Footer

Baro nga ospital, naluktan iti Quirino

QUIRINO, Ilocos Sur – Pormal a naluktan ti Quirino Primary Health Care Facility ditoy nga ili idi Marso 20.

Kangrunaan a sangaili iti panaglukat ti nasao nga ospital ni Department of Health Assistant Regional Director Dr. Benito Arca ken timmabuno ditoy dagiti agtuturay daytoy nga ili nga indauluan ni Mayor Cliffor Patil-ao.

Kagiddan a nabendisionan iti daytoy met laeng a pasken ti kabarbaro nga ambulansia.

Kinuna ni Dr. Ringo Querrer, hepe ti nasao nga ospital, nga agpaay daytoy a katulongan ti rural health unit a mangtaming kadagiti umili nga adda problemada iti salun-at.

Kinunana a mataming iti ospital dagiti pasiente a mai-confine iti tallo nga aldaw ngem no aglabes daytan, maipan iti nangatngato nga ospital.

Nasurok a P25 milion ti nabusbos iti pannakaipatakder ti ospital babaen ti pondo manipud iti DOH ken counterpartna a pondo manipud iti lokal a gobierno ditoy.

Kinuna ni Patil-ao a dakkel a pagsayaatan ti nasao nga ospital kadagiti kailianna agsipud ta saandan a maitaray pay iti kabangibang nga ili no adda masakit a kasapulanna ti naan-anay a pannakataming.#