Footer

EDITORIAL: Isalakan dagiti Ubbing iti Cancer

Makikaykaysakami a mangibunannag iti panangisalakan kadagiti ubbing iti sakit a cancer. Isu nga inkam makiraman iti pannakairakurak ti mensahe ‘toy makabulan a Cancer in Children Awareness Month a nangrugi iti petsa uno agingga iti agtapos daytoy a bulan ti Abril.  Mamatikami a napateg la unay a maammuan ti amin maipapan iti  sakit a cancer dagiti ubbing.

Dagiti tipo ti cancer nga agdebelop kadagiti ubbing ket maiduma la unay kadagiti nataengan; nupay kasta, nalaklaka ketdi a maagasan dagiti ag-cancer nga ubbing ta addaanda iti 80% 5-year survival rate; ad-adu pay ti maagasan babaen ti chemotherapy ta nalaklaka nga agreak ti bagida itoy a wagas ti panagagas.

Iti laksid itoy, ti pay laeng cancer ti maysa a kangrunaan nga ipapatay dagiti ubbing. Apay kadi a mapaspasamak daytoy? Dayta ti dakkel a kuestion a nasken a mailawlawag ken maipakaawat iti asinoman.

Pudno la unay a ti cancer ket major public health threat iti sibubukel a lubong. Isu nga adda daytoy awareness—panangipaganetget iti maipapan itoy. Nupay nalaklaka a maagasan dagiti ubbing ngem dagiti nataengan, saanna a kayat a sawen ti pannakaaadda iti nalabes a kompiansa; laglagipen koma a kanayon a ti panangliklik itoy ket nasaysayaat nga amang ngem iti panagagas. Kaaduan ngamin a kaso ket saan a naikaskaso wenno saan a naammuan a dagus, naladawen idi maammuan a nakaron ti kasasaad ti pasiente. Daydiay damona nga stage ket naitungtungkua, saan a naipakita iti doktor iti panangipagarup a gagangay laeng a sakit. Naladawen idi naammuan nga addan iti nakana a kasasaad ti pasiente. Iti saan a pannakadetek a nasapa ti kinaadda ti sakit, nakana a panagsagaba ti lak-amen ti pasiente, ti pamiliana, dagiti asideg kenkuana ken ti komunidad a yanna.

Ti prebension ti kangrunaan ti amin, nasaysayaat iti panangliklik ngem ti panagagas. Nasaysayaat ti panangmentenar ti kinasalun-at babaen ti pannangan kadagiti nasustansia a taraon ken well-balanced diet ken naynay nga ehersisio; kangrunaanna, tinawen ti panangipakita dagiti annak iti doktor—ta naynay ngamin a saan nga ibaga ti ubing ti marikriknana, iyaleng-alengna laeng.

Narigat unay ti makidangadang iti sakit a cancer dagiti ubbing. Isu nga adda daytoy tinawen a pannakairakurak ti impormasion tapno maliklikan iti nakana a sagabaen.#