Footer

MANNUROT: Ni Senador Miriam ken dagiti Kaang-angatna a Boys

Kolum ni Danny Antalan

(Tuloyna)

Duelo met ti saritaan da Gobernador Chavit Singson ken ni Senadora Santiago a nagramut iti panangibagana a ni Gobernador Chavit ti operator ti jueteng iti Ilocos Sur ken Ilocos Norte idi tawen 2010 nga insigida met a pinaglibakan ti gobernador iti dayta a gundaway.

Inawagan ni Gov. Singson ni Santiago iti ‘Brenda’ kabayatanna nga inawagan met ti senadora ti gobernador iti ‘Sabit’.

Kayat a sawen ti Brenda nga awag ni Gov. Singson ken ni Santiago ket  ‘brain damage’, awag kaniana daytoy manipud pay idi 1992 idi timmaray daytoy kas presidente.  Imbaga ti gobernador nga aglemlemmeng daytoy iti ikub ti parliamentary immunity kas maysa a senador, imbagana pay idi nga ipilaanna iti kaso ti sobra a kinabaknang ni Santiago.

 

MIRRIAM VS PACQUIAO

Mainaig met iti biblia ti nagboksingan ti kapanunotan ni Senador Santiago ken ni 8th Division Boxing champ Manny Pacquiao.  Partikular la unay iti bersikulo a “go forth and multiply.”

Ni Santiago, maysa kadagiti nangsuportar iti Reproductive Health bill nga itay nabiit ket nagbalin a linteg, ti nangikalintegan iti takderna a saan koma rumbeng a literal ti panangawat ni Pacquiao iti kayat sawen iti Biblia.

Ni Pacman ti saan a pabor iti RH Bill ti nagkuna a sursurotenna ti Biblia.

Kinaritna ni Pacman nga agdinnanoganda laengen, he he.  Kinaritna pay iti debate ti kongresista.  Siempre, no debate ket pagmulugmogna laeng ni Pacquaio, ket no patulan met ni Pacman ti senadora iti boksing, hmmm… di la ammon no di maunnat ti buok ti senadora.

Ngem knock out ti senadora, kasla one-punch TKO idi  insalakan  ni Mommy Dionisia ti anakna, pulos a di nakakunail ni senadora Santiago kadagiti balikas ti natangken a nanang.

 

NI AGUIRRE A NAGAPPUT TI LAPAYAGNA

Wen, bayat ti kangitingit ti impeachment trial ken ni sigud a Chief Justice Renato Corona, nagbalin a sikat ni Atty. Vitaliano Aguirre II, maysa kadagiti abogado ti prosecution team.

Inapputna ti lapayagna bayat ti panagsersermon ti senadora kadagiti abogado ti prosecution team iti dayta a gundaway.

Inaklon met ni Aguirre ti panangappotna iti lapayagna a nagkunaanna a matitileng ngamin daytoy iti kanayon a panagung-ungetna kadakuada.  Dinan kayat a mangeg pay ti makarimon a boses ti senadora a kanayon a highblood isu nga inapputnan ti dua a lapayagna.

Gapu iti dayta, contempt ti inanusanna a pannusa manipud iti impeachment court.

Adu pay ti kinaangat ti senadora.

Saanen a mabilang no mano ti kinarkarit ken kinaang-angatna bayat ti panagtakemna iti senado. Pakairamanan ditan da sigud a presidente Fidel V. Ramos, uray dagiti papadi, agraman pay ditan ti COMELEC, Sandiganbayan ken dadduma pay.

Kanayon payen nga aghighblood gapu ta bumaket  ngaruden, nalakan a ngumato ti temparatura ti darana.  Ngem biit la no kua a makaanges, nagsubli manen iti rostrum tapno dita a bumasnot manen.

Ngem uray pay kanayon nga agpakita iti duktor gapu ngarud iti sagubanitna, ngem pagay-ayattayo latta met.

Gapu kadagitoy:

 

Miriam: Balita ko, meron ka raw kulasisi na 18 years old.

Politican: Lumang balita na yan. 28 years old na siya ngayon.

 

Ken daytoy pay:

 

Matalinong babae + Matalinong lalaki = Romance

Matalinong lalaki + Bobong babae = Affair

Matalinong babae + Bobong lalaki = Kasal

Bobong lalaki + Bobong babae = Sexually Transmitted Disease

 

Adda pay, dagiti pick-up lines.

 

Kapag mamamatay na ako, huwag na huwag kang pupunta sa libingan ko kasi baka tumibok ulit ang puso ko.

 

Miss, cuchara ka ba? Kasi palapit ka palang, napapapanganga na ako.

 

Suicide, homicide, insecticide, lahat pamatay. Pero kung gusto mong pampabuhay, i-try mo ang ’by my side.

 

’Di ketdin, isuna ti nangpauso iti pick-up lines.  Gapu met laeng iti kinakalogna, isu a mangab-abak latta.  Pagaayattayo latta a dengdenggen ti bosesna.  Ammona ti mangpaisem ti siasinoman. Manmano ti kas kenkuana.

Banag a di kabaelan daytoy dagiti kabalubalna, ta kasano koma a sanguenda ti nasiglat iti trabaho, naemma iti pagtaengan, ken ammona a pagkatawaen dagiti agtutubo?  Manmano ti kasta, kunam sa.

Ket gapu iti dayta, ni senador Miriam Defensor Santiago ti paborito dagiti Filipino, ta ammona ti bumasnot, ngem ammona ti mangay-ayo.#

Comments are closed.