Footer

Nabungbongan nga ikan, nakumpiska

SAN JUAN, La Union – Aganay a 160 kilos nga ikan a nabungbongan ti kinumpiska dagiti polis ditoy idi parbangon ti Marso 25.

Segun iti report, pinasardeng dagiti polis iti checkpoint ti maysa a truck a minaneho ti maysa a Maximo Petalbeno, 46, ken taga-Barangay Poro, Magsingal, Ilocos Sur idi agarup alas dos ti parbangon ti nadakamat a petsa kalpasan a nakaawatda iti report a nagkarga daytoy iti nabungbongan nga ikan.

Kinumpiska dagiti polis dagiti karga ti truck a binaniera a lames kalpasan a pinatalgedan ti fish examiner a nabungbongan dagitoy.

Napalubosan met laeng ti akinkukua kadagiti lames a nainaganan Rose Reyes, 47, naasawaan, ken residente iti Barangay Poro, Magsingal, Ilocos Sur, kalpasan a napagmulta.

Naiwaras dagiti nakumpiska a lames kadagiti pasdek-kaasi ditoy nga ili.#