Footer

SINURSUR: Aksidente kadagiti Agad-adal, Asino ti Mapabasol?

Kolum ni Jobert M. Pacnis 

  (Maudi iti dua a paset)

 

Malagipko la ket ngarud met ti fieldtrip-mi idi addaakon iti kolehio. Destinasion: geothermal plant idiay Laguna. Ken opisina ti NAPOCOR.

Apagisu a pinnunnomi nga agkakaadalan ti maysa a van. Gapu ta van, maysa laeng ti drayber. Naannayas met ti biahemi idi mapakami. Ngem idi agawidkamin, iti paset ti kabambantayan ti Nueva Vizcaya, kellaat a nailibay ti drayber gapu siguro metten iti awan sarday a biahe ket nakuranganen iti turog. Ta awan met kasinnukatna. Naimbag ta napuotan ti kaadalanmi a kaabayna ket daytoy ti nangpaguni kenkuana idi madlawna a sabalin ti turong ti lugan. Sakbay a matnagkami iti derraas, naawiden ti naklaat a drayber ti manibela. Uray la naganit-it ti lugan iti pangprenona kalpasanana.

“Ngannganitayon!” nakunami laengen. Dakkel a pagyamyamananmi iti dimi pannakadisgrasia.

Itoy a napasamak ni Cacai, nakalbit manen dagiti maseknan nga ahensia tapno adalenda ti pannakaipawil dagiti fieldtrip nga awan ti pakainaiganna iti panagbasa dagiti ubbing. Ta, wen, nasakit a kinapudno itan nga agbalbalinen a negosio dagiti dadduma a pagadaln ti fieldtrip. Kadawyan a nangatngato nga amang iti magasto ti estudiante iti panag-fieldtrip-na ti singiren ti pagadalan kenkuana. Di met makapagkedked dagiti nagannak ta narigat no gapu laeng iti fieldtrip, saan a makapagturpos ti nagrigrigatanda nga insakad nga anak. Ta kinapudno payen a ti fieldtrip, agbalbalinen a final exam kadagiti dadduma.

Iti Commission on Higher Education Memorandum Order No. 17, nalawag nga ibagbagana a dagiti fieldtrip, rumbeng nga asideg laeng ken mabagaan nga umuna ti komision nga akinsakup iti lugar tapno maadal/makita daytoy no adda pagpeggadan dagiti ag-fieldtrip. Maikabassit pay no kua ti gastos dagiti nagannak.

Apagserrek met ti ubing iti umuna a tukad ti kolehio, nakailanaden iti student handbook ti maipapan iti fieldtrip. Daytoy a banag, mailawlawag iti mapasamak a general orientation sakbay ti panangrugi ti klase. Ditoy a mapagpapatangan tapno adda man makita a pagdaksan/pagpeggadanna, marisuten a nasapa.

Malagip nga idi Mayo itay napan a tawen, ginisar dagiti kongresista ti administrasion ti CHED gapu iti panangpalubosda kadagiti nagngingina a fieldtrip a napaspasamak kadagiti adayo a luglugar. Adda pay kadagiti sabali a pagilian.

Maysa met laeng nga agpampanday ti linteg iti Kongreso ti nagkuna a di koma agbalin ti fieldtrip a suno dagiti kangrunaan nga eksaminasion a pagdalanan dagiti estudiante.

Kadagiti saan a makabael a dumar-ay iti fieldtrip, saan koma a pakaigapuan ti di panagturpos ti maseknan nga ubing. Maikkan ketdi daytoy iti aktibidad iti asidegna a dakkel met laeng ti pakainaiganna iti kurso nga al-alaenna.

Iti nasao a memorandum, sakupenna amin a kolehio ken unibersidad. Ket ti asino man a mapaneknekan nga opisial/mannursuro ti pagadalan a pinagkakuartaan ti fieldtrip, mabalin a maikkat iti puestona gapu iti grave misconduct.

Iti met interbiu ti media iti DepEd, kinuna ti ahensia a dida mabalin a paisardeng dagiti fieldtrip ta dakkel ti maitulongna daytoy iti panagbasa dagiti ubbing. Kaniada laeng, siguraduenda a maipatpatungpal ti linteg a mangsaluad iti karadkad dagiti maseknan.

Ngem di pay nalnalpas ti imbestigasion iti napasamak ni Cacai, sabali manen nga aksidente ti napasamak. Uppat nga estudiante iti Pangasinan ti natnag iti periswel  iti uneg ti pagadalan ta rambakan daytoy ti anibersariona.

Sabali laeng ti kaipadpadamag nga ipupusay ti maysa nga agad-adal iti elementaria ta dinanog ti kaadalanna nga agtawen laeng iti siam.

Nakakaskas-ang dagitoy a pasamak. Namnamaen nga addada iti nasayaat nga ima dagiti annak kabayatan ti kaaddada iti uneg ti pagadalan ngem sabali met ti realidad.

Ti nakapatay nga ubing, awan ti makuna a a kriminal a sungsungbatanna ta nalawag a nakalanad iti linteg a dagiti laeng agtawen iti 18 agpangato dagiti mabalin a makasuan iti kriminal. Ketdi, saan a makalisi iti sibil a responsibilidad aglalo dagiti nagannak kenkuana ken kasta metten ti pagadalan. Ken dakkel a trauma ti ibunga daytoy iti biagna a bakbaklayenna iti unos ti panagbiagna nupay agdalan iti pannarabay ti DSWD kalpasanna.

Kuna dagiti eksperto, dagiti kastoy a pasamak, adda dakkel a nagramutanna a masapul a kitaen, ipangag, adalen dagiti nagannak ken mannursuro. Mabalin a bayolente itan dagiti ubbing gapu kadagiti makitkitada iti aglawlaw aglalo iti pagtaenganda wenno kadagiti mabuybuyada iti telebision. Pannarabay ngarud ti nasken kadakuada. Napateg a kaduaen ida iti panagbuyada ken limitaran no di man ipawil a maminpinsan ti panagay-ayamda kadagiti bayolente a games iti computer.

Daytoy ngarud ti rumbeng a makita: ti pannakabalanse ti amin. Ken ti naiget a pannakaipatungpal dagiti linteg. Iti kasta, awanen ti sabali pay a Cacai nga agbalin a biktima. -0

 

Comments are closed.