Footer

Artipisial ti panagkurkurang mailaklako a karne ti baboy iti tiendaan ti Vigan City?

VIGAN CITY – Artipisial laeng ti panagkurkurang ti suplay ti baboy a maparti ditoy siudad?

Limtuad daytoy kalpasan nga impalgak ni Konsehal Loreto Quibilan bayat ti naudi a session ti sangguniang panlungsod ditoy siudad a naduktalanna nga adda dagiti agparparti iti baboy a mapapati nga adda regular a supsuplayanda iti karne iti ruar ti siudad.

Impalgak daytoy ni Quibilan kalpasan a dinamag ni Konsehal Benjo Versoza ken ni Konsehal Henry Formoso, chairman ti committee on market, no maipasigurado dagiti meat vendors nga adda naan-anay a suplay dagiti maparti a baboy a mailako iti tiendaan publiko ditoy no mapatgan ti kiddawda a maingato ti presio ti karne ti baboy.

Napaliiw a kimmirang ti karne ti baboy a mailaklako iti tiendaan ti Vigan maigapu iti mapapati a nangato ti demand agsipud iti napalabas a Semana Santa a kaadu ti bisita iti siudad ken iti panangrugi ti panagkampania para iti masungad nga eleksion.

Sakbayna, maysa a resolusion ti impatulod dagiti meat vendors iti sangguniang panlungsod a nangkiddawanda ti pannakaingato ti presio ti karne ti baboy iti P170 kada kilo manipud iti P160.

Kangrunaan a rason dagiti meat vendors ti ingingina ti presio ti liveweight nga angkatenda kadagiti hog raisers.

Bayat ti pannakatratar iti session ti nasao a resolusion, sinaludsod ni Verzosa no agbalin a sungbat ti pannakaingato ti presio ti karne ti baboy iti panagkurkurang ti suplay ti maparti a baboy iti siudad.

Ngem insungbat ni Formoso a saan a maipasigurado dagiti meat vendors ti kaadda iti umdas a maparti a baboy a mailako iti tiendaan ti siudad uray no maipangato ti presio ti karne ti baboy.

Ditoy nga impalgak ni Quibilan, chairman iti committee on agriculture, ti duktalna nga agkurkurang ti mailako a karne ti baboy iti siudad agsipud ta adda dagiti supsuplayan dagiti meat vendors iti siudad nga aglaklako manipud iti sabali nga ili.

Indagadag ni Quibilan nga uray aglako dagiti meat vendors iti siudad kadagiti sukida iti sabali nga ili, kitaenda nga adda mailasin nga umanay a suplay ti karne a mailako iti tiendaan.

“Iti panangdawatda iti pannakaingato ti presio ti karne ti baboy iti Vigan, rebbengna nga  ipasigurado pay nga umuna dagiti meat vendors nga adda umanay a suplay. No saanda a maipasigurado, apay ketdin a maipangato ti presio ti karne ti baboy?” kinuna ni Quibilan.

Kabayatanna, imballaag dagiti meat vendors iti Magsingal a saandan nga aglako pay no saan nga italtalek ti sangguniang bayan ti kiddawda a maipangato ti presio karne ti baboy.

Kiniddaw dagiti meat vendors ti pannakaipangato ti presio ti karne ti baboy iti sangguniang bayan ngem mapapati a maysa nga opisial ti nagkuna a tratarendanto laengen ti nasao nga isyo kalpasan ti eleksion.

Naammuan nga ingngato lattan dagiti meat vendors ti presio ti lakoda a baboy iti baet nga awan ti pammalubos manipud iti sangguniang bayan ngem impatalgedda nga ibabadanto met laeng ti presio no bumaba ti presio ti liveweight.#

 

Comments are closed.