Footer

EDITORIAL: Agbayadtayo iti umno a buis

Ita nga aldaw, Abril 15, ti maudi nga aldaw a panagipila iti buis para itoy a calendar year. Rumbeng la unay nga agbayadtayo iti umno a buis, saan a gapu ta nainget ti kampania ti gobierno tapno makolekta iti ad-adu a buis a pangsarakuy iti dumakdakkel a budgetna, no di gapu ta pagrebbengantayo daytoy kas umili a mangitantandudo iti panagdur-as ti pagiliantayo.

Saan a mailibak a  dakkel nga ilgat ti national budget ket agpannuray iti makolekta a buis. Itoy a punto, mangnamnama dagiti tax payers a mausar dagiti buisda kadagiti programa, gannuat ken proyekto nga addaan kaitutopan ken  kaipapanan a rumbeng a mangitaguyod iti pagimbagan ti amin nga umili nangruna iti pannakaideliber dagiti basic services.

Taltaluntonen ti gobierno ti umno a dana ket naragpatna ti panagbalbaliw: manipud iti masaksakit a kuting,  nagbalin a kabarbaro a tigre iti Asia.  Saan a ti bibig ti gobierno ti nagtaudan ti  pammigbig ken panangitandudo no di ket kadagiti kaparangetna ken sabsabali pay a pagilian nangruna kadagiti agpalpaliiw iti pannagna ti ekonomia.  Ti umno ken maitutop a pannakapataud ti badiet babaen ti panagbayad iti umno a buis ken ti maitutop a pannakaaramat itoy ti makitami a nangikabil ti pagilian iti disso ken kasasaad a kaitutopanna iti agdama.

Napaliiwmi a serioso ti BIR iti nainget a kampaniana maikontra kadagiti saan a mangideklara iti umno a bayadanda a buis manipud iti napastrekda a kaban iti kamaligda; gapu iti dayta, kannigid ken kannawan dagiti tax payers ti naaddaan iti asunto ken naidarum  gapu iti panaglabsingda ken panangliklikda iti maitutop nga obligasionda. Serioso ti gobierno a mangragpat iti targetna a buis ket saan laeng a ti BIR   no di pay ti Bureau of Customs ken dadduma nga income generating line agencies ti agpursige nga agkolekta iti puntiriada a buis.

Iti panagkitami, in-inut nga agminar ti raya ti agsapa gapu iti sersioso a saritaan a pannagna iti “daang matuwid”;  iti biangmi, saan nga agbiag dagiti umili babaen ti sao ken kari nga awan ti namnamaen a pagtaudanna wenno dagiti papogi points dagiti agpaspasin-aw iti nagan para iti bukodna a panggep. Saan nga ikari ti langit no addaka a nakatakder iti sirok ti init.

 Rumbeng laeng nga isubli kadagiti agbaybayad iti buis nangruna kadagiti babassit a mangmangged ti makapnek a serbisio ken panumaranda met laeng dagiti imbuisda; progreso ti ibunga ti umno a panagbayad ti buis a mausar para iti pannakaitalo ti panagbiag dagiti umili. (JMA, Jr.)