Footer

Summer sports clinic, rinugian nga angayen ti Vigan City

VIGAN CITY – Rinugian ti gobierno ditoy siudad nga angayen dagiti nadumaduma nga sports clinics para iti daytoy a summer.

Nangrugi itay Abril 9 ti swimming lessons para kadagiti ubbing sadiay Mira Hills. Maang-angay manipud iti 8:00 a.m. agingga iti 11:00 a.m., agpatingga daytoy inton Abril 18.

Nangrugi metten ti panagadal  iti taekwando itay Abril 8 ket agpatingga inton Mayo 10. Inaldaw ti panagsursuro dagiti partisipante iti daytoy nga sports manipud iti 8:00 a.m. agingga iti 11:00 a.m.

Makabulan ti panagadal iti lawn tennis a nangrugi itay Abril 10 agingga iti Mayo 10 manipud iti 8-10 a.m. ken 2:00-4:00 p.m.

Inton Mayo 6-17 ti pannakaangay ti panagsanay iti chess manipud iti 4:00 p.m. agingga iti 6:00 p.m. idinto nga inton Mayo 20-24 ti panagsursuro iti gymnastics ken arnis.

Inwayat ti city government dagitoy tapno adda pakaiturongan ti atension dagiti ubbing ken agtutubo ita a bakasion ket maiyadayoda iti dakes a bisio ken barkada.#