Footer

Daytoy Election Gun Ban

Komentario ni Jobert M. Pacnis

(Umuna a paset)

 

ITAY Enero 13, pormal a nangrugi ti election period iti pagiliantayo. Kadaytoy met laeng nga aldaw a nangrugi ti election gun ban, total gun ban pay ketdi. Daytoy ti pannakaipawil ti panagbitbit wenno panagimet ti paltog (uray pay dagiti airsoft gun a maus-usar kadagiti extreme sports), uray pay lisensiado, tapno maikabassit no di man maliklikan dagiti dakes a pasamak kadagiti agsupadi a grupo dagiti politiko ita ta mapaspasungadan manen ti nabara a basingkawel.

Itay sarabuentayo ti Baro a Tawen, maysa nga ubing ti biktima ti nayaw-awan a bala. Isu daytoy ni Stephanie Nicole Ella. Naiddep ti narayray koma a masakbayanna gapu laeng iti aramid ti dadduma nga awan bibiangna iti aglawlawna— masaktan man dagitoy. Iti pamilia ni Nicole, daytoy ngatan ti kalaladingitan a panangsaraboda iti baro a tawen.

Idi met Enero 6, maysa a pinnaltog ti napasamak iti maysa a tsekpoint iti Atimonan, Quezon. Sangapulo ket tallo dagiti natay; maysa ti nasugatan. Agsusupadi dagiti rumrummuar ita a report. Shootout. Rubout. Ambush. Adda dagiti narekober a paltog. Ngem ita a masursurat daytoy, naaw-awengen nga ambush ti napasamak.

Adtoy pay. Asino ti makalipat iti panagpaltog idiay Kawit, Cavite?  Mapapati nga adda ti suspek iti impluensia ti maiparit nga agas. Iti kallabes, simrek kano iti politika ngem di napagasatan nupay adu ti nangikarkari iti tulongda. Dayta ti nagmuriotanna ket idi “nabartek” iti maiparit nga agas, innalanan ‘tay iduldulinna nga igam. Dayta laengen nagpaltog a kasla manok ti namay-anna kadagiti kalugaranna. Sangapulo dagiti natay.

Gapu kadagitoy a pagteng, nariing ti pannakayimplimentar ti total gun ban.

Simple laeng ti maadal ditoy. Adu latta dagiti agtagikua iti paltog nga awanan iti naan-anay a disiplina; ken adu latta dagiti kolorum a paltog a maar-aramat iti kinadakes. Dagitoy ita ti isapsapulan dagiti otoridad iti solusion.

Basingkawelto manen. Panagruar dagiti kolorum nga armas. Mausar dagitoy a kas pannalaknib kadagiti politiko; pammutbuteng kadagiti botante; ken panggudas kadagiti kalaban.

Kinapudno met ketdi nga iti panagtagikua iti armas, makarikna iti talged aglalo kadagitoy a panawen a di masinuo ti seguridad. Dayta ngarud ti gapuna nga adu latta dagiti mayat a maaddaan iti paltog, iti man legal wenno wenno illegal a wagas.

Pagdaksanna, adu dagiti di responsible nga agimet kadagitoy nga armas. Ta naglaka met ngamin ti makapalisensia. Kuna ti linteg a masapul nga addaan iti naan-anay nga edad (21 agpangato) ken “good moral character” ti agpanggep a maaddaan iti armas. Kasano ngaruden ti mental a kasasaad ti indibidual a mayat a maaddaan?

Ta iti pammaltog idiay Kawit, Cavite, rimmuar a nakapasa ni Ronald Bae a suspek iti pagalagadan kadagiti mayat a maaddaan iti armas. Legal ti edadna, with good moral character idi nagaplay a mangala ti lisensia ti tallo pay met nga igamna (otomatik nga AK-47, M-16 nga Elisco ken kalibre .45 a Sig Sauer, semi-otomatik). Ngem idi napasamak ti panaghuramentadona, ti saan a lisensiado a 1911 kalibre .45 ti inusarna.

Daytoy koma ti kitaen dagiti agpanpanday linteg ken dagiti otoridad. Inayon payen dita dagiti kolorum nga armas.

(Adda tuloyna)