Footer

EDITORIAL: Saluadantayo ni Ina a Daga iti pannakaabuso

Rumbeng la unay ti panangipaaytayo iti maitutop a panangilalala ken importansia ken ni Ina Daga a pagnanaedantayo, nangruna itoy nga aldaw, Earth Day. Maitutop ken rumbeng la unay daytoy a tignay ta iti panagukrad dagiti takiag dagiti nawada a muging, naibbatan, nabaybay-an wenno naidisso ti kinapateg ni Ina Daga.

Babaen daytoy nainlubongan a pagteng,  imutektekan, sirmataen, ipaganetget ken iwaragawagtayo ti kinapateg ni Ina Daga. Ta asino pay koma ti mangipateg kenkuana  no di datayo nga agnaed? No ditayo mangitaltalek, datayo met laeng ti agsagaba. Marabrabngis ni Ina Daga babaen ti kinalabes nga aramid a panagimbubukod; panangdadael ti nakaparsuaan, panagiwara kadagiti basura,  pannakakalbo dagiti bantay ken kakaykaywan,  pannakasabidong dagiti waterways, sobra a panagusar kadagiti agipugso iti carbon dioxide, ken dadduma pay a makailuod nga aramid.

Isu nga agkaykaysatayo a  mangipaganetget iti isu amin nangruna kadagiti ubbing ken agtutubo nga ipategda daytoy pagnanaedantayo a lubong ket saantayo a baybay-an nga idalapupo ti nagamrud nga utek. Agtimektayo ken makibiang para itoy a panggep ken makipartisipartayo kadagiti addang a panangsaluad ken panangiyadal iti umno ken maitutop nga  aramiden tapno masalakniban ni Mother Earth.

Tunggal maika-22 ti Abril a maselebraran ti Earth Day. Iti daytoy nga aldaw, maiwayat dagiti  panagmula kadagiti kaykayo, panagdaldalus iti aglawlaw ken pannakaidalimanek dagiti basura, konserbasion ken panag-recyle kadagiti mabalin nga i-recycle, ken dadduma pay a wagas tapno maikkatan dagiti babantot ti nakaparsuaan.

Igunamgunammi ketdi a  saan laeng koma a daytoy nga aldaw laeng ti panangipakat iti panangilala ken ni Ina a Daga. Masapul a saluadantayo iti amin nga aldaw. Saan a maisalakan ti Ina a Daga babaen laeng ti ningas kugon wenno papogi points no di ket naing-inget a pannakibakal kadagiti dakes nga aramid nga in-inut a mangidurduron iti Ina  a Daga iti panungpalan.

No agtignay ti amin para iti sangsangkamaysa a pagimbagan ni Ina a Daga, agsubli met laeng dayta nga imbag kadatayo, ta agsiray nga awan duadua dagiti nasayaat nga aramid.

Saantayo ngarud nga itungtongkua pay ti panagtignaytayo. Addan dagiti pagilasinan iti  agtultuloy a pannakairurumen ni Ina a Daga, kas iti kumarkaro a pudot, pumigpigsa a bagyo, layus, igaaw, nakaro a lamiis, ken dadduma pay a mangidateng iti didigra ken panagsagaba kadagiti tattao. No saantayo nga italtalek dagiti pagilasinan,  maymaysa ti turongen dagitoy: panungpalan kadatayo nga  abusado nga agnaed.#

 

Comments are closed.