Footer

Motorista, nakidinnungpar ti luganna, kritikal ti kasasaadna

SAN ESTEBAN, Ilocos Sur – Kritikal ti kasasaad ti maysa a motorista iti ospital gapu iti grabe a sugatna kalpasan a nakidinnungpar ti motorsiklona iti maysa a kotse iti pagkurbaan ti national highway a sakup ti Barangay Villa Quirino idi parbangon ti Abril 16.

Segun iti report manipud iti polis ditoy, awan ti puot ni Agustin Espiritu, addaan naan-anay nga edad, agnaed iti Barangay San Nicolas, a naitaray iti ospital  kalpasan a nakidinnungpar ti motorsiklona iti Susuki Alto a minaneho ni Peter Paul Wasan, residente iti Barangay San Antonio, Candon City.

Iti inbestigasion, agpaabagatan ti motorsiklo idinto nga agpaamianan ti Suzuki Alto idi mapapati a kimmaut ti kotse iti linia ti motorsiklo a nagtungpal iti panagdinnungparda.

Immuna a naitaray ti biktima iti maysa nga ospital iti Sta. Maria sa naiyalis iti San Fernando City, La Union, gapu kadagiti nakaro a sugatna.#