Footer

Ti politika iti panagsapul iti panggedan

Kolum ni Jobert M. Pacnis

(Umuna a paset)

 

IDI agbasbasa iti haiskul ken kolehio, nangnangegnan dayta nagalas a proseso iti pannakastrek iti trabaho iti ikub ti gobierno. No asino ti asideg iti sakaanan dagiti nakatugaw iti trono, isu ti umuna a maiselsel. Palakasan, kuna dagiti Anggalog.

Ngem dina inkankano wenno pinatpati dayta. Makastrekakto iti panggedan a diak kasapulan ti tulong dagita a nakatugaw iti trono, kinunkunana. Ti kualipikasionkonto ti mangiserrek kaniak!

Innayonna pay: siguro, sao laeng dayta dagiti di makakaskastrek iti trabaho ta kurang ti inadalda. Wenno dida ketdi  kualipikado iti inaplayanda. Ta siempre, ti sapulen dagiti opisina ket dagitay namnamsek iti sirib a mangted iti produktibo a pagbanagan.

Isu nga inggaedna ketdi ti nagbasa. Saan a pinaikurisbong kadagiti sulisog iti panagadal kas koma kadagiti nagsasanga a bisio. Inadaywanna met ti barkada. Uray man ket ibagbagada nga awan ti pannakikaduana! Ti napateg, makalpas iti kursona iti umisu a panawen.

Ket nagbunga dagiti sakripisiona. Naileppasna ti kursona. Kasta met a naipasana ti board kadayta met la a tawen a panagturposna. Anian a ragsak dagiti nagannak kenkuana. Adda met laengen mangiragpat kadakuada iti rigat.

Apaman a nakumpletona dagiti papelna, pinadasna ti nagaplay iti siudad a nanga-laanna iti eksaminasion. Ngem pagdaksanna, sapulen ketdin dagiti kompania dagiti nagturpos kadagiti dadakkel ken am-ammo a pagadalan iti siudad. Saan a napateg no naipasam ti eksaminasion!

Ania ngarud ita ti ilabanna ket nagturpos met laeng iti maysa a kolehio idiay probinsia?

Naawanan iti namnama idi kaskasdi a pannakapaay ti resulta dagiti inaplayanna a trabaho. Nagsubli iti probinsia ta nagastos ti agtalinaed iti siudad.

Iti panagsublina iti ilida, innala ti alma materna iti haiskul nga ag-substitute teacher (nupay kinainhiniero ti nalpasna) iti dua lawas. Saan pay ngamin idi a naiget ti pannakaala dagiti ag-substitute. Ita, masapul a dagiti nagdalan iti assessment dagiti mabalin nga ag-substitute. Uray pay iselselnaka ti prinsipal no masiiman ti Division Office ti Departamento ti Edukasion a dika naki-assess, paikkatdaka met laeng.

Napardas a nalpas ti dua lawas a panangisurona iti Matematika. Dina ammo ta kellaat lattan a nasarakanna ti bagina a nangipateg iti panagisuro. Aglalo la ket ngaruden idi bagbagaan ti prinsipal ti pagadalan a mangala laengen iti unit-na iti Edukasion ta agsublinto a mangisuro yantangay di met laengen makakaskastrek iti kurso nga inleppasna.

Ket nasarakanna laengen ti bagina a nangala nga agpayso iti unit-na iti Edukasion iti kakaisuna a kolehio iti ilida. Ngem kadayta a panangalana iti unit-na, innala ti nasao a kolehio nga agisuro iti departamento ti hayskul ta nakitada ti inleppasna.

Inawatna ti diayada kenkuana. Nagisuro ngarud iti hayskul kabayatan ti panangalana iti unit-na. Naragsakan ta addan pangalaanna iti allowance ken pagbayad iti eskuela (ta di met ngarud inlibre ti pagadalan ti panag-basana). Saanen a dumawdawat pay kadagiti nagannak kenkuana.

(Adda tuloyna)

Comments are closed.