Footer

Appropriation ordinances ti RA 7171, inriing ni Bokal Singson a maisubmite iti sangguniang panlalawigan

VIGAN CITY – Sumagmamano nga ili iti probinsia ti saan nga agisubsubmite iti appropriation ordinances mainaig kadagiti programa ken proyektoda a punpunduan ti RA 7171, daytoy ti impalgak ni Bokal Jerry Singson itay nabiit.

Kinuna ni Singson nga inriingna ti panagisubmite amin nga ili iti probinsia kadagiti appropriation ordinancesda iti RA 7171 tapno makumpleto ti rekord ti provincial government mainaig kadagiti proyekto ken programa a nakaipanan dagiti bingay dagiti munisipio manipud iti excise tax ti tabako kas intuding ti nasao a linteg.

Innayon ni Singson a kangrunaan a panggep ti panangiriingna iti daytoy tapno saan nga agsisimparat dagiti programa ken proyekto ti gobierno probinsial ken dagiti munmunisipio.

“No saanda nga agisubmit, saanmi a makita no ania ti nalpasen, no ania ti madama, ken no ania ti mabalin a punduan ti gobierno probinsial,” inyunay-unay ni Singson.

Innayon ni Singson a no agisubmite dagiti munisipio iti appropriation ordinances ti tabako, iti man birhinia wenno burley, makitada no ania ti sumrekanda ken no ania ti mabalin nga itulong ti gobierno probinsial.

Nupay kasta, kinuna ni Singson a saan a compulsory nga agisubmite dagiti munisipio iti appropriation ordinances mainaig iti bingayda iti RA 7171.#