Footer

BANNER NEWS: Aluling bridge, naluktan kalpasan 35 a tawen a pannakatrabahona

CERVANTES, Ilocos Sur – Naluktan met laengen ti Aluling Bridge itay Agosto 15, tallupulo ket lima a tawen manipud narugian a naipatakder ditoy nga ili.

Nabirngasan iti “kaatiddogan a rangtay” iti pagilian gapu iti kabayagna a naipalpas, naluktan ti nasao a rangtay babaen ken ni Viel Aquino-Dee, manangen ni Presidente Benigno Aquino III ken nangibagi kenkuana, dagiti nangangato nga nga opisial a pakaibilangan da Department of Public Works and Highways Secretary Rogelio Singson, Department of National Defense Secretary Voltaire Gazmin, DPWH Region 1 Director Melanio Briosos, ken dagiti agtuturay iti Ilocos Sur nga indauluan da Diputado ti Maikadua a Distrito Eric Singson, Governor Ryan Luis Singson, Vice Governor Deogracias Victor Savellano, Cervantes Mayor Benjamin Maggay ken Tadian Mayor Anthony Wooden.

Ni koma Presidente Aquino ti manglukat iti 180 ti kaatiddogna a rangtay ngem saan a nakaumay gapu ta inatake ti allergy, segun iti kabsatna a ni Viel.

Iti imbasa ti presidential sister a bitla ni Presidente Aquino, kinunana: “Iti kamaudianan, naggibus met laengen ti panagur-uray ken panagsagaba dagiti taga-Cervantes. Nalpas met laengen, Apo.”

Iti State of the Nation Addressna idi Hulio 22, dinakamat ni Presidente Aquino ti Aluling Bridge a kas maysa kadagiti nakumpleto nga inprastruktura a proyekto ti administrasionna a naileppas iti nasurok a tallo a dekada gapu iti panagbaybay-a dagiti nagturay kadagiti kallabes a tawen.

“We have the Aluling Bridge in Ilocos Sur; 1978 was the year in which the plans for its construction were first laid down on paper. And we made certain that our successors would not merely inherit sheets of paper,” (“Adda ti Aluling Bridge iti Ilocos Sur; idi 1978 ti tawen a naiplaster iti papel dagiti plano para iti pannakaipatakderna. Ket impasiguradotayo a dagiti sumublat kadatayo ket saanto a pappapel ti tawidenda,”) kinuna ni Presidente Aquino.

Narugian idi 1978, agdagup iti P191.37 million ti nabusbos iti pannakaipatakder ti rangtay manipud iti pundo ti DPWH.

Kalpasan ti pannakadadael dagiti inisial a natrabaho idi 1990, naituloy ti pannakaipatakderna idi Febrero 1999 ngem adu ti nakataktakan ti pannakaitrabahona gapu iti layus ken bagyo ken saan a mapakpakadaan a panagbaliw ti tiempo ken irurungsot ti Karayan Abra.

Pinal a nakumpleto ti rangtay idi Marso 25 daytoy a tawen.

Segun kadagiti opisial, iti pannakalpas ti nasao a rangtay a nangbeltak iti Abra River a mamagkonekta iti ili ti Cervantes, Ilocos Sur ken Tadian, Mountain Province, pumardas ti panagbiahe iti Ilocos Region ken Cordillera Administrative Region (CAR), nangruna iti Mountain Province.

Manamnama a bumassit ti kapaut ti panagbiahe iti nagbaetan ti Cervantes ken Tadian iti 30 minutos ken naparpardasen ti pannakaibiahe dagiti produkto ken dadduma pay a tagilako iti patad ti Ilocos Sur, La Union, ken iti Benguet ken Mountain Province.

Manamnama pay ti iyaadu dagiti turista nga agpasiar iti Cervantes a mabirbirngasan iti summer capital of Ilocos Sur ken pakasarakan kadagiti tourist spots kas iti Bessang Natural Landmark, Gambang Falls, Yamashita Cave ken Municipal Tree Park.#