Footer

EDITORIAL: Makapadaringungo dagiti bugos nga NGO

Agdardaringungo ti agong dagiti umili gapu iti pannakasikap kadakuada dagiti salamangkero iti bugos nga NGO a nangsaypon iti kuarta ti ili. Ti pundo nga agpaay koma iti pagsayaatan dagiti umili ket inyagus ti binalitungeg a bileg dagiti saan a mabmabsog a bukatot. Makapadaringungo, agdardara ti agong dagiti umili ket agayus ti darada iti bulsa dagiti nalaing a managsalamangka ken nangpundar iti kinapresente dagiti bugos nga NGO a kunam la no pudno la unay nga isuda ti mangirepresentar kadagiti mannalon a di makaammo no asino ti kamanganda tapno makaasidegda iti kusina a makatulong a mangsilpo ti angesda.

Saan laeng a makapadaringungo no di pay ket saan a masinuo no apay a nagbalin a ngongo wenno saan a makapagsao iti nasayaat ken nalinteg dagiti opisial iti gobierno a naimbolbar iti maanomalia a transaksion. No apay a dida makatimek iti nalinteg wenno nangungoda,  dayta ti saan a mailawlawag a bileg ti salamangka. Wenno adda kadi makalkaluban, mailimlimed a hukos-pukos daydayyakos? Mahika ti ay-ayam iti politika?

Daytoy P10 billion pork barrel scam a nakaguyodan iti isyo ti nagan dagiti walo a senador ken duapulo ken uppat a diputado; ti P900M Malampaya gas fund nga agpaay koma kadagiti biktima iti bagyo Ondoy ken Pepeng ket nakakitaan iti lemma ti mahika ta ultimo dagiti siam a pulo ket pito a mayor ket maipagarup a naaramat ti naganda a dida napupuotan; dagita ti sumagmamano a nakailatagan ti kinaadda dagiti bugos nga NGO, ken kas iti natakuatan iti audit ti COA. Makali pay koma iti naun-uneg a pakaiyaonan ti ad-adu pay nga impormasion tapno nalawlawag ti banagen ti panagpalutpot ti DOJ.

Tapno maliklikan a manayonan pay ti mahika, mataming koman to FOI bill tapno adda pakaammuan iti nalawag a detalye dagita soft projects kada hard projects iti PDAF ta segun iti alingasngas ket dita a nagapon dagiti adu a bugos nga NGO.

Dagitoy kadi nga eksena ket gagangayen iti gimong? Dumtengto met ti panawen nga agbaaw ti isyo  dagiti bugos nga NGO? Ania ti maitutop nga aramiden? Kas umili, nasken nga agbalintayo a bigilante, agsiputtayo, makibiangtayo kadagiti banag a pakaseknantayo. Agtimektayo ken iyebkas dagiti makitkita ken naammuantayo. Ta no agulimek lattan ken ditayo nga aramiden, asino pay koma iti mangaramid?#