Footer

Gannuat a vermiculture, naipangruna

SIUDAD TI SAN FERNANDO –  Gannuat  nga ipangruna ti city government itoy a siudad ti vermiculture wenno panagtaraken iti igges a maawagan iti African Night Crawler tapno makatulong a mangipatungpal iti organic farming ditoy.

“Ti takki dagitoy nga igges ket nasayaat a ganagan ken papintasenna pay ti kalidad ti daga,” nakuna ni  Wilfredo Abengona, in-charge iti vermiculture iti San Fernando City Agriculture Office, maysa kadagiti mangilunglungalong iti vermicomposting, maysa a proseso a pakaaramidan iti organic fertilizer ken  pestisidio a pagisprey manipud kadagiti nagrupsa a banbanag a mailaok iti takki dagiti igges.

Pinili dagiti kameng ti City Councilor Paolo Ortega’s Governance Trailblazing Project team  ti  vermicomposting kas kangrunaan a proyekto a maidarirag kadagiti mannalon ken agmulmula kadagiti nateng iti arubayan gapu iti kinapategna kas organic a ganagan.  Makatulong pay daytoy a mangkissay iti peggad nga ibunga ti global greenhouse effect ken mangidaulo a mangpasayaat iti salun-at kadagiti vegetarians ken umili a dida ammo nga addaandan iti ipapauneg a makadangran a taraon gapu kadagiti kemikal a maipaspasuyot kadagiti mulmula.

Impalawag ni Abengona iti lektiurna a dagiti vermicomposting materials ket 50 porsiento nga agtaud kadagiti rugit ti dinguen kas kadagiti baka, nuang, kabalio ken kalding (malaksid iti lugit ti manok) ken 50 porsiento met nga ukis iti saba, bulbulong, ruruot, garami, naggapu iti kusina ken dadduma pay a makuna a biodegradable (marupsa) a materiales.

Naadal a ti vermicompost wenno vermicast no mausar a ganagan kadagiti taltalon, hardin, nurseries ken uray pay iti landscaping ket pasayaatenna ti pisikal nga istraktura ti daga, padam-egenna dagiti micro-organisms kas iti enzymes, paaduenna dagiti igges ken pasayaatenna met iti panangtengngelna iti danum.

Mabalinen nga apiten dagiti ganagan iti 30 agingga iti 40 nga aldaw, wenno ikkan iti nayon pay a 14 nga aldaw tapno maaddaan dagiti igges iti gundaway nga agitlog ken umaduda.  Segun ken ni Abengona, no ad-adu dagiti igges ad-adu met ti sustansia a maagsep ti daga.

Iti kaso dagiti mula a nateng, “awan sabali nga aramidentayo no di ikkan laeng kadagiti napaglalaok a ganagan iti aglawlaw ti naimula wenno iti abut a pangipisukan iti bunubon, nakuna ni Abengona.

Manipud iti vermicompost makaaramid iti pagisprey a pormula.  Ilaok ti maysa a paset ti vermicompost, molasses, danum ket buruen iti dua nga aldaw.  Sagaten ti mixture ket isu ti yisprey kas ganagan ken pangpatay kadagiti insekto.

Iti pannakasubok ti nasao a teknolohia, impakaammo ni Abengona a dua barangay idiay Bangbangolan ken  Bato  ti namulaan iti tarong ken kamatis.  Naduktalan a nadagdagsen dagiti bunga ti kamatis ken tarong, a kayatna a sawen, napuspuskol ti lasagda uray pay no di unay darakkel.

Nalawag a daytoy ti resulta ken epekto dagiti ganagan nga organic, kinuna ni Abengona.#

 

 

 

Comments are closed.