Footer

Kaso 3 ubbing a naikkat gapu’t panagpapatangda iti Ilokano, addan iti CHR, DepEd

ni Errol L. Abrew

 

CITY OF SAN FERNANDO, La Union  –  Addan iti ima dagiti opisial iti Commission on Human Rights National office ken Regional ken Department of Education National, Region I, ken iti Divison ti Ilocos Norte ti kaso dagiti tallo nga estudiante iti hayskul a napagtalaw iti pagadalanda gapu iti inda panagsao iti Ilokano.

Daytoy ti impakaammo ni Dr. Ariel Solver Agcaoili, Presidente iti Nakem Conferences International ken chief convenor iti International Committee in Support of Bautista, Abadilla and Respico iti pannakisarita ti Tawid News Magasin kaniana iti online.

Segun kadagiti datos nga inted ti Change.org adda 566 a nagpirma a naggapu iti amin a suli ti lubong sakbay a naipan daytoy a petision kadagiti maseknan nga autoridad.

Impila met da Rep. Rodolfo C. Fariñas, Congressman 1st District, Ilocos Norte ken Kabataan Partylist Rep. Terry Ridon iti House Resolution Number 192 tapno maimbestiga ti nasao nga insidente.

Idi Hulio 31, binilin ni Rev. Brian Shah, akinkukua iti Saviour’s Christian Academy, babaen iti maysa a memo ni Prof. Cristeta A. Pedro, prinsipal ti pagadalan, a bagaanna a bumirok laengen da Carl Andrew A. Abadilla, Kleinee Xieriz Bautista ken Samuel G. Respicio,  agpapada a Grade 8 (second year hayskul), iti sabali a pageskuelaanda kalpasan a naduktalanda a nagpapatang iti Ilokano iti uneg ti pagadalan a mapapati a panaglabsing iti polisa ti eskuela a panagsao laeng dagiti estudiante iti English.

Immuna a nagparang ti insidente iti blog ni Herdy Yumul (riknakem blog) ket napardas a nagramaram iti cyberspace.

Iti panangaklon ti Nakem Conferences International ti nasao a kaso, kayat dagiti petitioners a maikkat ni Shah ken mapagawid pay idiay pagilianna a Singapore. Nakuna dagiti petitioners nga iti isusuportada kadagiti tallo nga estudiante isu met iti isusuportada iti institusion iti mother tongue-based multilingual education a polisa iti pagilian kas naibando iti Enhanced Basic Education Act of 2013, kas nalatak a maaw-awagan iti Republic Act No. 10533.

Impalagip pay dagiti petitioners kadagiti amin a maseknan a ti panagsao iti kabukbukodan a lengguahe ket maysa met kadagiti makunkuna a linguistic rights iti dakdakkel a saklawen ti human rights iti international man a paglintegan kas sagudayen ti United Nations.

Nakuna pay dagiti petitioners nga ikalinteganda tapno malapdan kadagiti agpanggep a mangiparit iti daytoy na-ingkonstitusionalan a karbengan a kasapulan a marespetar iti uray sadino man, uray pay no eskuelaan a kas iti SCA nga addaan makunkuna nga “English only,” policy.

Kabayatanna, nangipablaak ni Sha iti public apology gapu iti   inaramidna ket nagkari a pasublienna dagiti tallo nga ubbing iti eskuelaanna nga isu payen ti makaammo a mangsukat iti pinagtuisionda iti yaalisda iti sabali nga eskuelaan ken impanamnamana nga isu ket saan nga anti-Ilokano.

Ngem kuna met dagiti petitioners ken dagiti nagannak a saan a kas karina ti agpadispensar ta  na-trauma dagiti ubbing ken naburibor dagiti kaririknada gapu iti napasamak.

Iti pannakaisurat daytoy, maysa a petision ti madama nga agwarwaras iti internet a mangidawdawat ken ni Presidente Benigno Simeon Aquino III a waswasenen dayta “English only” a kolinisador a polisa kadagiti eskuelaan ta di metten maitutop iti kaadda ti baro a reporma ti edukasion a maawagan K + 12 a mangipangruna iti nakayanakan a pagsasao.#