Footer

Maika-4 a SONA ni Pres. Aquino, ania ti makunam, kabagis?

Salaysay ni Jobert M. Pacnis

(Umuna a paset)

 

NALPASEN ti maikapat a SONA ni Presidente Benigno Aquino III, kabagis. Daytoy ‘tay makunkuna nga State of the Nation Address wenno reportna kadatayo nga umili. Laonen daytoy dagiti naaramidan ti administrasionna iti kalkalpas manen a makatawen a panagserbina kadatayo.

Iti rekord ti pagiliantayo, ‘bagis, daytoyen ti kapautan a SONA—immabot iti maysa nga oras ken 42 a minuto. Ne, ket mabalin a kunaem, no dimo nabuya, nga adu ngarud ti nasaona. Nga adu ngarud ti inreportna a naaramidanna– ti administrasionna.

Ala, kadawyan daytan iti asino man a presidente. Ikannawagna dagiti naaramidanna ta di ket kunaen dagiti kritiko a “naturog laeng iti pansitan” ti inar-aramidna.

Ita, padalanantayo man dagiti dadduma a naibinsabinsana iti SONA, ‘bagis. Adda kenkan a mangutob kadagitoy no umanamongka wenno saan. Ta datayo man met nga umili ti pudpudno a makaammo kada-gitoy.

Umuna, ti maipanggep iti Pantawid Pamilyang Pilipino Program wenno ad-adda nga am-ammo a 4Ps. Daytoy ‘tay mangmangted iti suporta kadagiti marigrigat a pamilia. Adda aw-awaten dagitoy a pangsupusop iti panagbiagda iti kada bulan. Kunana, manipud iti dati a 700,000 a pamilia nga adda iti babaen ti programa idi tawen 2010 a panangrugi ti panagtakemna, mapan kanon nga 4 a riwriw daytoy. Ket iti sumuno a tawen, panggepna nga ikalawa ti sakup daytoy a programa. Karamanton ditoy dagiti annak nga agedad agingga iti 18.

Ne, dika umisem, kabagis. Saan a gapu ta adu dagiti sagibsibmo ket mangigisen ‘ta isemmo. Laglagipem, para kadagiti annakmo dayta a tulong. Saan a para iti bukodmo a pagimbagan. Saan a para iti bisiom.

Maikadua, iti benneg ti agri-kultura a mabalin nga itarapnostayo iti ekonomia. Manipud kano pay idi nagtakem, bimmaban ti panagangkattayo iti bagas kadagiti sabsabali a pagilian. Manipud iti dati a 2 riwriw a metriko tonelada idi 2010, umab-abot laengen iti 350,000 metriko tonelada. Napintas dayta a damag, saan kadi, kabagis? Ngem agurayka, apay ngarud nga agan-annay met latta dagiti adda iti benneg daytoy a pagsapulan? Ne, diak met ketdi im-impluwensiaan ti panangutobmo kadagiti pasamak, ‘bagis!

Impanamnama pay ti presidente ti naiget a pannaksaluad dagiti baybaytayo kontra kadagiti ilegal a mangngalap tapno iti kasta, agnumar dagiti kailiantayo, ‘bagis.  Saan laeng a dagiti ganggannaet ti kayatna a sawen ditoy. Pati dagiti kadaraantayo nga ilegal ti wagas ti panagkalapna. Nasayaat unay daytoy aglalo no maakem dagiti maseknan nga ahensia ti trabahoda a mangsaluad itoy a kinabaknang ti pagiliantayo.

Maipanggep met iti riri a daga iti Hacienda Luisita a kanayon kano a pakaikonekan ti naganna, siraragsak a mangipakaammo nga idi pay Pebrero, naidalusen ti Department of Agrarian Reform dagiti listaan dagiti maikkan iti benepisio. Ket manamnama nga itoy bulan ti Septiembre, maibunongen kadagiti benepisiario dagiti lote a nabayagen nga ilablabanda a  malagip nga iti kallabes, nakaipatlian pay ti biag dagiti dadduma a mannalon.

Sadiay met Iloilo, naipanam-nama ti pannakataripato/pannakasaluad dagiti irigasion tapno umadu ti apit ket makapataud iti suplay a mangsupusop iti panagkasapulan ti pagiliantayo aglalo no panawen dagiti kalamidad. Saan la koma ngarud a sadiay a paset ti pakaipakatan ti kastoy a programa ta ammotayo met, ‘bagis, nga adu pay dagiti probinsia a mangnamnama latta iti tudo tapno makatalonda. Daytoy koma ti maikkan iti importansia.

(Adda tuloyna)