Footer

2 mannanakaw, nabigbig babaen ti CCTV

VIGAN CITY – Babaen ti tulong ti footage manipud iti CCTV, nabigbig ti dua a lalaki a nangtakaw iti wallet ti maysa nga estudiante nga inkabilna iti compartment ti motorsiklona nga imparkingna iti igid ti kalsada ti Barangay 1 ditoy siudad idi aldaw ti Agosto 14.

Kanaig daytoy, itay Agosto 22, pinilaan dagiti polis iti kaso a panagtakaw da Atanacio Mike Forges Piano, alias “Boy”, 18, naasawaan, ken ni Richmond Nisco Utanes, 16, baro, agpada a residente iti Barangay Capangpangan.

Kinuna ti polis a malaksid ti footage manipud iti CCTV a nainstolar iti asideg ti nakapasamakan ti panagtakaw, maysa a residente iti Barangay I, ni Elai Joshua Versoza y Barroga, 17, ti nangbigbig kadagiti suspek babaen met laeng iti CCTV footage.

Idi aldaw ti Agosto 14, nagpulong iti polis ni JJ Conrad Guerrero y Tolentino, 24, naasawaan, estudiante, ken residente iti Barangay Pantay Fatima, Vigan City, a natakaw ti nangisit a petakana a naglaon iti P18,000.00 ken napapateg a dokumento nga inkabilna iti compartment ti Honda XRM a motorsiklona nga imparkingna iti Gen. Luna Street, Barangay I.

Iti panangsukimat dagiti polis iti footage ti CCTV, nakitada ti dua a lalaki a naglugan iti Honda XRM motorcycle a maris puraw ken nangisit a nanglabas iti nakaparking a motorsiklo sada nagsubli ket pinorsarda a linukib ti compartment ti tugaw ken innala ti nangisit a petaka.

Nabigbig ti maysa a suspek, ni Piano gapu ta adda rekordna iti polis.

Nabigbig met ti kaduana a ni Utanes babaen ken ni Verzosa a nakakita iti pananglukib dagiti suspek iti seat compartment ti lugan.

Ti pannakainstolar ti CCTV kadagiti pagtagilakuan ken matatao a lugar iti siudad ti idardarirag ti kapolisan agsipud ta dakkel a katulongan dagitoy iti pannakabigbig dagiti agisayangkat iti krimen ken pannakasolbar dagitoy.#

Comments are closed.