Footer

Baro, naiyanud bayat ti panagbantayna iti asar

TUBO, Abra – Di pay nasarakan ti bangkay ti maysa a baro a naiyanud bayat ti panagbantayna iti asarna a naipakat iti karayan sadiay Barangay Amtuagan, ditoy nga ili idi Agosto 18 a kangitingit ti Bagyo Maring.

Nakadanon pay iti Vigan City, Santa ken Caoayan, Ilocos Sur ti grupo dagiti kakabagian ni Lino Calantay, 32, baro, mannalon, ket nagpanawaganda iti radio no adda nasalsalaw dagiti agnaed kadagitoy a lugar a madalanan ti karayan Abra a pattapattada a nakaiyanudan ti biktima.

Segun ken iti barangay kapitan nga agnagan Doming, mismo a nakitada ti pannakaiyanud ti biktima ngem awan nakaitured a nangarayat kenkuana gapu iti napegges nga agus ti karayan.

Kinunana a nagpakaammo ti munisipio ti Langiden idi malem ti Domingo nga adda nakitada a bangkay a maiyan-anud ket patienda a bagi daytoy ni Calantay.

Maipalagip a nagturong ti biktima iti karayan tapno bantayanna ti asarna ngem kellaat a nagdinakkel ti karayan ket naiyanud.#

Comments are closed.