Footer

Aksidente ti lugan: doktor, natay; insakayna, nasugatan

CANDON CITY – Pimmusay iti ospital a nakaitarayanna ti maysa a doktor kalpasan a naikras ti motorsiklo a minanehona  iti kalsada sadiay Barangay Bagani Gabor ditoy siudad idi rabii ti Agosto 19.

Pimmusay ni Dr. Albert Galut y Galoso, MD, 58, residente iti Barangay Bagani Gabor bayat ti pannakaagas dagiti sugatna iti Saint Martin De Porres Hospital  idinto a maag-agasan met iti Candon City Hospital ti insa-kayna a ni Carlo Gagarin y Abundo, 29, baro, ken residente iti Barangay Bagani Tocgo ditoy met laeng siudad.

Segun iti panagimbestiga dagiti polis, agarup alas 10:00 ti rabii ti nadakamat a petsa idi aggawid ni Galut manipud iti talonda a nakasakay iti motor-siklo a nakiliabaran ni Gagarin ket idi daliasatenda ti nagkur-baan ti Candon-Salcedo Road a sakup ti Barangay Bagani Gabor, mapapati a naigalis ti pilid ti motorsiklo ket saan a nakontrol ni Galut ti manibela a nagresulta iti pannakadungparna iti steel gate ti balay ti maysa a Charles Bao-ingan.

Segun iti polis, awan ti aramat a helmet dagiti biktima idi maaksidenteda.

Kabayatanna, dinungpar ti maysa a bus ti kongkreto nga alad ti maysa a funeral home sadiay Bulag East, Bantay, Ilocos Sur idi rabii ti Agosto 21.

Iti report manipud iti polis Bantay, idi agarup 10:15 ti rabii ti nadakamat a petsa, agpalaud a direksion ti Daewoo Bus GMW Trans a minaneho ni Romeo Valdez y Sacramed, 38, naasa-waan, ken residente iti Pukel, Sanches Mira, Cagayan idi maysa a puraw a kotse ti kellaat a naggapu iti Flying V Gasoline Station nga agpadaya ket iti panangilisi ni Valdez iti bus, napukawna ti kontrolna iti manibela a nakaigapuan ti pan-nakadungparna iti kongkreto nga alad ti Pineda Funeral Service.

Awan ti nadunor a pasahero.

Inako ti GMW Bus Trans ti pannakaibaklay ti magasto iti pannakatarimaan ti alad ti Pinea Funeral Service.#

Comments are closed.