Footer

Naglibas a balud, sapsapulen dagiti polis

TAGUDIN, Ilocos Sur – Di pay natuntonan dagiti polis ti balud a naglibas iti seldana idi Agosto 15 iti baet ti isaysayangkatda a manhunt operation.

Iti kaudian a report, saan pay a nasarakan dagiti polis ni Joel Soriano Mostoles, 30, naasawaan, ken residente iti Barangay Ilokano, Sudipen, La Union, kadagiti suspetsaenda a lugar a posible a paglemmenganna.

Maipalagip nga idi agarup alas 9:35 ti rabii ti Agosto 15, nalibasan ni Soriano ti guardiana a ni PO1 Mae Roselle Lubrin Lacasandile babaen ti panagpammarangna a makaib-ibbleng.

Segun ken ni Police Senior Inspector Napoleon Siyo Gao-ay, OIC, inreport kenkuana ni Lacasandile ti panaglibas ni Soriano kabayatan ti panagrekoridada kadagiti pasdek-negosio, pagadalan ken dadduma pay a napateg a pasilidad.

Dagus a nakikoordinar da Gao-ay kadagiti kaparangetda a police stations ken iti quarantine checkpoint iti Barangay Bio, Tagudin idinto a nangipatulod  kadagiti polis kadagiti posible nga exit points a pagnaan ti balud ngem negatibo amin ti resultada.

Iti inisial a panagimbestiga dagiti polis, sumagmamano a minutos kalpasan ti ipapanaw da Gao-ay tapno mapanda agpatrolia, kiniddaw ni Soriano ken ni Lacasandile ti ipapanna iti kasilia agsipud ta makaib-ibbleng.

Nupay kasta, kinuna ti polis nga urayenda ti panagsubli ti alert team.

Kalpasan ti sumagmamano a minutos, kinarintar manen ti balud ti polis agsipud ta dina kanon maigawid ti iruruar ti takkina.

“Ma’am, rummuaren,” mapapati a kinuna pay ti balud.

Kinuna ni Lacasandile nga aguray ni Soriano ta apanna ayaban dagiti kaduana iti ngato.

Ngem idi limmabas ni Lacasandile iti selda, kellaat a ginammatan ti balud ti makannigid a takiag ti polis sana binekkel agingga iti napukaw daytoy ti puotna.

Mapapati a nalettat ti balud ti padlock babaen ti panangkurikorna daytoy iti natirad a banag sa nagtaray a rimmuar iti akinlikud a ruangan.

Manipud iti maikatlo a kadsaaran, bimmaba da PO3 Renel Ibea ken PO1 Roel Manangan ket pinadasda a kamaten ti balud ngem saandan a nasapulan.

Sumangsango ni Soriano iti panaglabsing iti Sec. 5 ti RA 9165 wenno Comprehensive Dangerous Drugs Act iti Regional Trial Court,  Branch 25, ditoy nga ili.#