Footer

Turista, 2 pay mapukpukaw, agtultuloy a masapsapul

BAGUIO CITY — Agtultuloy ti panagbirok dagiti rescuers iti babai a turista a naireport a mapukpukaw iti Sumaguing Cave manipud pay idi Domingo.

Kinuna ni Sagada Municipal Disaster Risk Reduction and Management Officer Robert Pangod nga agtuloy ti search operation ken ni Eufrocinia “Irene” Manaois, turista a taga-Pangasinan, uray maparigatan dagiti rescuers nga agbatok agsipud ta nagdinakkel ti underground water level iti kueba ken awan ti teknikal nga expertise dagiti divers nga agbatok iti kaunegna a 154 metro.

Mapapati a naiyanud ni Manaois idi nagdinakkel ti underground water gapu iti monsoon rains.

Karaman ni Manaois kadagiti 30 a turista a pakaibilangan ti 13 nga estudiante a Japanese a nakubong iti Sumaguing Cave gapu iti flashflood.

Malaksid ken ni Manaois, naisalakan amin dagiti 30 a turista ket naipanda iti ospital para iti pannakatamingda.

Nupay kasta, rimmuaren dagitoy malaksid ti maysa nga agpalpalaing pay laeng iti St. Theodore’s Hospital iti Sagada.

Kabayatanna, inreport ni Acting OCD-CAR Regional Director ken CDRRMC Chairman Andrew Alex Uy a mabirbirok pay ni Rosalino Calantay, 32, baro, ken residente iti Barangay Amtuagan, Tubo, Abra, ken ni Monching Bakidan ti Natonin, Mountain Province.

Naiyanud ni Calantay bayat ti panagbantayna ti asarna iti karayan idi Agosto 18 a kangitingitan ti Bagyo Maring idinto a mapapati a nalmes ni Bakidan iti panagballasiwna iti Karayan Chico sadiay Bontoc.

Sakbayna, indeklara ti lokal a gobierno ti Benguet ken daytoy siudad iti pannakasuspenso latta ti klase manipud iti pre-school agingga iti high school gapu iti agtultuloy a maibuyat a napigsa a tudo.

Segun iti Cordillera Disaster Risk Reduction Management Council iti baet a nakapanawen ni Bagyo Maring iti pagilian, ginuyodna latta ti angin-Habagat a nangibuntog kadagiti tudo  gapuna a naparuk-atan ti sobra a danum iti Ambuklao ken Binga dam sipud pay idi Lunes, Agosto 19.

Nupay kasta, kinuna ni Benguet Governor Nestor Fongwan a nainget a siputanda ti pannakaibulos dagiti danum kadagiti dua a dam tapno saan a mangitunda iti layus iti probinsia ti Pangasinan. (Karaman ti report ni Redjie Melvic M. Cawis, PIA Cordillera)

Comments are closed.