Footer

Dapo laengen ti nalmes a baro, inyawid ti pamiliana

STO. DOMINGO, Ilocos Sur – Dapo laengen a nagsubli iti Batangas ti baro a nalmes bayat ti panaglalangoyda iti baybay a sakup ti Barangay Sived ditoy nga ili idi Agosto 24.

Inkeddeng ti pamilia ni Frederick Egar y Perez, baro, panadero, natibo ti Barangay Macalamcam-A, Rosario, Batangas, a saandan nga iyawid a nakalungon ti bangkay daytoy no di mapadapo babaen ti crematorium.

Maipalagip nga idi Agosto 24,  naggiinom ti biktima ken dagiti kakaduana nga stay-in a panadero a pakairamanan da Adrian Manalo y Cordero, 23, naasawaan,  natibo ti Tiquiwan, Rosario, Batangas ken Lexter Yarte y Rivero, 20, baro ken residente iti Brgy. Battog, Sinait, Ilocos Sur iti balay ni Marvin Cantos, kabagian ni Agaran, sadiay Barangay Puro, Magsingal.

Idi aggawidda iti agarup 2:00 ti malem, inkeddeng dagiti agkakadua ti panagdidigosda iti baybay sadiay Barangay Sived.

Mapapati a naiyanud ti biktima gapu iti napigsa a koriente.

Naisayangkat ti search and retrieval operation ngem napaay dagiti otoridad gapu iti dakes a tiempo.

Nasarakan ti bangkay ti biktima nga agtatapaw iti kabaybayan a sakup ti Sitio Loob, Barangay Manzante,  Magsingal idi agsapa ti Agosto 26.#