Footer

2 pay a drug pusher, natiliw iti buy bust operation

VIGAN CITY – Dua pay a masuspetsa a drug pusher ti tiniliw dagiti nagtitipon a police elements bayat ti insayangkatda a nagsina a buy bust operations  sadiay Poblacion Norte, Burgos, Ilocos Sur ken Barangay Ayusan Norte, ditoy siudad idi Oktubre 15 ken 17.

Nakabalud ni Clinton Divina y Manacdac, 18, baro, ken residente iti Barangay Ambugat, Burgos, Ilocos Sur a napakatan iti buy bust operation babaen dagiti joint elements ti Sta. Maria police station nga indauluan ni SPO3 Joel Dasargo babaen ti direkta a superbision ni Police Senior Inspector Regino Mendoza Genoso, Jr., Intel PNCO ti Narvacan Police Station, polis manipud iti PDEA ISSET ken iti koordinasion ti Burgos police station nga indauluan ni Police Inspector Lawrence Keith Calub.

Maisayangkat koma ti buy bust operation maikontra ken ni Divina iti sementerio iti Barangay Poblacion Sur, Sta. Maria, Ilocos Sur ngem binaliwan ti suspek ti lugar ket naaramid ti transaksion iti rangtay sadiay Poblacion Norte, Burgos.

Nupay kasta, nagballigi dagiti polis a nangipakat iti operasion ket natiliw ni Divina kalpasan a nakumpiska iti ikutna ti 3 a babassit a heat sealed plastic sachets a naglaon iti mapapati a shabu nga agdagsen iti sumurok kumurang a .2 grams a mapattapatta nga agbalor iti P3,000.00, 2 a sag-P500.00 a naaramat iti buy bust operation, Nokia a selpon, ken ti Honda Wave 125 a naaramat iti pannakaibiahe kadagiti nakumpiska a droga.

Kabayatanna, iti pannakaisursurat daytoy, nakakustodia met ni Anna Rose Arruejo y Salimao, 30, awanan asawana, ken residente iti nadakamat a barangay iti police station ditoy siudad idinto a maisagsaganan ti kaso a panaglabsing iti RA 9165 maikontra kenkuana.

Maysa a police operative ti nagpammarang a gumatang iti droga ket apaman a naiyawat ken ni Arruejo ti namarkaan a buy bust money, dinagdagus dagiti polis ti immasideg ngem mapapati a nasiputan ida ti suspek ket dagus nga immuneg iti balayna sana inrikep ti ridaw.

Pinorsar dagiti operatives a linuktan ti ridaw ket narekobreda iti ikut ti suspek ti P500.00 a marked money.

Iti insayangkat dagiti polis a panagsukisok iti balay ti suspek babaen ti search warrant nga inyisio ni Judge Francisco Ante, Jr. ti Municipal Trial Court in Cities, Vigan City ken babaen ti PDEA RO1 Control Number 1013-00053, nakakumpiskada iti dua a heat sealed plastic sachet a mapapati a naglaon iti shabu, getteng, 2 lighters, glass totter, improvised scoop, 2 aluminum foils nga addaan masuspetsa a shabu residue, 2 plastic sachet nga addaan mapapati a shabu residue ken 40 a plastic sachet a maaramat para repacking.

Sinaksian dagiti barangay officials ti panagsukisok dagiti polis iti balay ti suspek.

Iti apagtapog daytoy a bulan, nagsasaruno dagiti insayangkat dagiti polis a buy bust operations sadiay San Ildefonso, Narvacan, ken Vigan City a nakatiliwan ti pito a tattao a pakairamanan iti maysa a dati sheriff iti maysa a korte iti siudad.#

Comments are closed.