Footer

3 nagudas iti nagsisina a pammaltog

CAOAYAN, Ilocos Sur – Tallo a pammaltog ti nagsasaruno a naisayangkat  sadiay Caoayan, Bantay ken San Juan itay napan a lawas a nakagudasan dagiti tallo a biag.

Naireport a napapatay ni Melinol Manzano y Arce, 38, tricycle driver ken residente iti Barangay Naguilian, Caoayan idi 8:45 ti Oktubre 14; ni Lawrence Villano y Pacano, 38, residente iti Barangay Alinaya, Pidigan, Abra; ken ni Roxan Jay Ventura y Sabugo, 29, baro, mannalon, ken residente iti Barangay Malamin, San Juan, Ilocos Sur.

Iti pammaltog iti Caoayan, madama a makipatpatang ni Manzano iti maysa nga agnagan iti Chris Tolentino y Tabile, 35, kalpasan a nagbayad ti naud-udi iti utangna idi pinaltogan dagiti suspek a nagaruat iti nalabaga a t-shirt ken short pants ken bullcap.

Naglibas dagiti di nabigbig a suspek a naglugan iti asul a motorsiklo iti direksion nga agturong iti Barangay Beddeng, Vigan City.

Nakasarak dagiti inbestigador iti dua a kapsula manipud iti cal. 45 iti nakapasamakan ti krimen.

Iti pammaltog iti Bantay a naisayangkat iti agarup 11:30 ti bigat ti Oktubre 16, madama ti panagpalutpot dagiti polis no asino ti drayber ti motorsiklo a nagsakayan ni Villano idi mapapatay.

Limtuad iti inbestigasion nga agpaamianan a direksion ti Kawasaki Barako a motorsiklo a minaneho ti di pay nabigbig a nakiluganan ti biktima iti San Julian, Bantay idi inorbertekan ti suspek a naglugan iti RUSI motorcycle sana  pinaltogan ti biktima a nakatamaan ti ulo daytoy.

Nupay naikras ti luganda iti abaga ti kalsada, mapapati a linuganan ti drayber ti motorsiklo a nakisakayan ti biktima, nag-u turn sa mapapati a simmurot kadagiti suspek a nagpataray nga immadayo.

Nakarekobre ti SOCO team iti maysa a kapsula manipud iti cal .45 iti crime scene.

Madama ti panagpalutpot dagiti polis no apay a tinarayan ti drayber ti biktima a kalubbonna iti motorsiklo.

Kabayatanna, dead on the spot ni Ventura idi pinaltogan ti di pay nabigbig a suspek idi agarup 11:40 ti rabii ti Oktubre 17.

Sakbayna, naggiinom ti biktima ken sumagmamano a bisita iti maysa a kasangay iti kaarrubada ket idi aggawiden dagitoy, intulod pay ida ni Ventura ken ti kasinsinna a ni Nixon Erese y Ventura agingga iti traysikelda.

Tallo a nagsasaruno a putok ti nangeg ket nakita laengen ti biktima a naidalutaytay iti daga, nagsagrap kadagiti sugat iti likud.

Nakasarak dagiti nagresponde a polis iti tallo a kapsula ken maysa a bala manipud iti gauge 12 shotgun iti nakapasamakan ti krimen.

Di pay ammo ti motibo ti pammapatay.#

Comments are closed.