Footer

Bagas nga NFA, agkurkurang ti mailako iti tiendaan

VIGAN CITY – Iti baet ti pammasingked ti National Food Authority nga adda umdas a suplay ti bagas iti probinsia, linagidaw dagiti rice sellers ditoy siudad ti bimmassit a lakoda a bagas manipud iti nasao nga ahensia.

Iti pannakipatpatang ti lokal a media kadagiti aglaklako iti bagas iti tiendaan publiko ditoy, kinunada a manipud iti sangapulo kaban a bagas manipud iti NFA nga ilakoda iti makalawas, nagbalin laengen a lima a kaban ket ilakoda laeng dagitoy iti las-ud ti maysa nga aldaw.

Naammuan manipud kadagiti aglaklako a nagtalinaed ti presio ti NFA rice a P27.00 kada kilo idinto a bimmaba ti presio ti commercial rice iti P34.00 manipud iti P36.00 kada kilo.

Segun kadagiti aglaklako, bimmaba ti presio ti commercial rice iti P1,650.00/cavan manipud iti P1,800.00/cavan ket kangrunaan a paggapuan dagiti lakoda a bagas iti Bantay ken Sto. Domingo.#