Footer

BANNER NEWS: P10,000 kidkiddawen ti Comelec, ited met laeng dagiti barangay captains

VIGAN CITY – Nagkirem dagiti barangay captain iti probinsia iti sanguanan ti ballaag ti Commission on Elections a mapakatanda iti pannusa no saanda a mangilatang iti pondo a mausar iti barangay elections inton Oktubre 28 daytoy a tawen.

Nagbaliw ti pagtaktakderan dagiti barangay captain kalpasan nga imballaag ni Provincial Election Officer ken acting Vigan City Election Officer Atty. Rhodora Arocena a mapakatan iti election offense dagiti barangay captain a saan a mangited iti kidkiddawen ti poll body a pondo a mausar iti masungad nga eleksion.

Kas maibatay iti Section 50 ti Omnibus Election Code, mangilatang dagiti lokal a gobierno iti pondo a maaramat iti kasapulan ken resonable a pagbayad kadagiti miembro iti board of election tellers, board of canvassers ken iti pannakaimprenta dagiti election forms ken pannakapaadda dagiti sabsabali pay nga election paraphernalia, ken iti pannakainstolar dagiti polling booths.

Sakbayna, nagpirma iti resolusion  dagiti opisial ken miembro ti Association of Barangay Captains, Ilocos Sur Chapter a saanda nga agbayad iti P10,000.00 kas augmentation fund a singsingiren ti Comelec a mausar para iti masungad a barangay election.

Ngem kalpasan a nakaawat ni ABC President Mario Subagan iti surat manipud iti Comelec En Banc Resolution a mapakatan iti election offense dagiti barangay captains a saan nga agtungpal iti kiddaw ti poll body, kinunana a nagbaliw ti takderda ta saandan a kabaelan a kamaten pay ti nasao a resolusion gapu iti time constraint.

Idi Oktubre 18 ti naudi nga aldaw a panangited dagiti barangay captains iti nasao a kantidad iti election officers ti ilida.

Kabayatanna, nangrugin ti panagkampania dagiti kandidato para iti barangay elections kalpasan a naggibus ti panagipilada iti kandidaturada itay Oktubre 17.

Sakbay daytoy, impakat ti poll body ti gun ban manipud iti Septiembre 28 agingga iti Nobiembre 12, 2013. Iti daytoy a tiempo, maiparit ti panagikuyog iti paltog ken dadduma pay a deadly weapons iti ruar ti pagtaengan.

Exempted iti gun ban dagiti law enforcers on duty ken nakauniporme. Mabalin met nga exempted iti gun ban dagiti security a pribado idinto a dagiti sabali pay a kameng ti law enforcement agencies ket masapul nga agaplayda iti permit nga agikuyog iti armas.

Sumango dagiti aglabsing iti iti daytoy a pammilin ti poll body iti pannakabalud manipud iti maysa a tawen agingga iti innem a tawen, permanente a diskualipikasion nga agtugaw iti public office ken saanen a makabutos pay.

Iparit pay ti Omnibus Election Code ti pannakaiyisio dagiti appointment, promosion, pannakabuangay dagiti baro a puesto, wenno panagited iti salary increases iti pagopisinaan ti gobierno, pannakabalbaliw iti teritorio ti maysa a presinto wenno pannakaipasdek iti baro a presinto, illegal a pannakawayawaya dagiti balud ken iti panagpataud iti pundo babaen ti pasala, loteria, pallot, ken dadduma pay.

Agpatingga ti campaign period iti Oktubre 26 ket maangay ti eleksion inton Oktubre 28.

Maigiddan koma iti daytoy a panagpipili ti pannakabutos met dagiti puesto para iti sangguniang kabataan ngem pinirmaan ni Pres. Benigno Aquino itay Oktubre 3 a maitantan ti eleksion para SK.#

Comments are closed.