Footer

Conservation Center, manamnama a pamastrekan ti Vigan City ken sentro ti kultura

VIGAN CITY – Ti Conservation Center ti kadakkelan ita a proyekto ti city government iti daytoy a tawen a manamnama nga agbalin a pamastrekanna ken sentro ti kultura apaman a malpas.

Ngem kinuna ni Konsehal Juan Carlo Medina nga agkurang ti nailatang a pondo para iti nasao a proyekto agsipud ta innem a pasdek ti maipatakder, isu nga agkiddawda iti tulong manipud ken ni Cong. Ronald Singson ken iti sumagmamano a senador para iti pannakaileppas daytoy a proyekto.

Buklen ti conservation center ti innem a pasdek a pakaibilangan ti dua a museum, maysa a technical school, maysa nga administrative building, maysa a showroom a pakaidispleyan dagiti produkto dagiti agbasa iti Iskwela Talyer ken maysa a hotel nga agbalin a “bread and breakfast” ti gobierno ti siudad.

Segun ken ni Medina, saan laeng nga agbalin a pamastrekan ti Vigan ti conservation center no di pay pakaipakitaan ti kultura ken kasta met a mangipaay iti panggedan ta ditoyton ti pagsanayan dagiti estudiante iti conservation techniques and guidelines.

Kinuna ni Medina a ti laeng Vigan ken Intramuros ti addaan iti kurso a heritage conservation, architecture and repair.#