Footer

Motorista, DOA iti ospital gapu iti aksidente

STA. LUCIA, Ilocos Sur – Natay ti maysa a motorista idinto a grabe dagiti sugat ti kasakayna gapu iti pannakidinnungpar ti luganda iti maysa a ten wheeler truck iti national highway a sakup ti Barangay San Juan ditoy nga ili idi sardam ti Oktubre 25.

Naideklara nga awanen ti biag ni Orlando Manzano Orillos, 41, naasawaan, ken residente iti Barangay Napaset, Balaoan, La Union idi maidanon iti Sta. Lucia District Hospital.

Naitaray met iti nasao nga ospital ni Arlene Corpuz, kasakay ni Manzano, ken residente iti Barangay Al-alludig, Santiago, Ilocos Sur sa naiyalis iti Candon City Hospital para iti pannakaagasna.

Saan a naan-ano ni Florencio Mangrubang Agradi, 51, naasawaan, drayber ti Isuzu ten-wheeler truck, ken residente iti Barangay 51-A, Nangalisan, Laoag City nupay nakaro ti dadael ti sungo ti luganna.

Iti panagimbestiga dagiti polis, agdaldaliasat ti Euro Sport Motorcycle a minaneho ni Manzano iti national highway a sakup ti Barangay San Juan ket inobertekanna ti maysa a bus iti nagpikuran ngem nasabatna ti ten-wheeler truck a minaneho ni Mangrubang a puon ti panagdinnungpar dagiti dua a lugan.

Gapu iti impact, naikras dagiti biktima iti dayaen a linia ti kalsada a nagtungpal iti pannakadundunor dagiti nadumaduma a paset ti bagida.

Intaray dagiti nagresponde a polis dagiti biktima iti Sta. Lucia District Hospital ngem naideklara ni Manzano a dead on arrival.

Boluntario a simmuko ti drayber ti ten-wheeler truck kadagiti nagresponde a polis ket naikustodia iti police station para iti pannakaimbestigana ken umisu a disposision.#