Footer

Nangitaray iti motorsiklo, natuntonan dagiti polis

CANDON CITY – Awan ti pagbayad daytoy a lalaki iti nainomna iti maysa a bar ditoy isu nga imbatina ti motorsiklona kas collateral sa nangitaray iti sabali a motorsiklo a paglugananna nga aggawid.

Natuntonan dagiti polis ditoy ti suspek a nainaganan a maysa a Peter Andaya y Mina, 29, baro, ken residente iti Gabur Sur, Sta. Cruz, Ilocos Sur babaen ti imbatina a motorsiklona iti bar a naginumanna.

Nagpulong iti polis ni Joedee Fabro y Fabro, 36, awanan asawa, manager ti Mambo Bar a masarakan iti national highway a sakup ti Barangay Paras, a natakaw ti motorsiklona a nangisit a Honda XRM 110J a nakaparking iti sanguanan ti paginuman idi agarup 3:00 ti parbangon ti Oktubre 13.

Segun iti maysa nga aglaklako iti asideg ti bar, nakitana ti maysa a lalaki a nakaaruat iti berde a hooded-jacket a nangsakay iti motorsiklo ket base iti deskripsion daytoy, naammuan a naginom daytoy iti nasao a bar ngem awan ti pagbayadna isu nga imbatina ti Racal a motorsiklona kas collateral.

Nagpalutpot dagiti polis iti Racal Motorcycle Branch sadiay Sta. Cruz a nagtungpal iti pannakatunton iti kinasiasino ti suspek ken pannakarekobre ti intaray daytoy a motorsiklo.#

Comments are closed.