Footer

Palpaliiw: Idi ken Ita, Sumalaysu nga Isyo

Ni Tatang Lakay

 

(Naisurat daytoy nga artikulo ditoy pagiwarnaktayo idi 2003, sangapulo a tawenen ti napalabas. Ngem ipablaakmi manen ta iti baet ti kaundayen dagiti naruros a tawen, kapaliiwan a dagiti napaspasamak idi ket mapaspasamak latta iti agdama;  awan ti ania a nagbaliwanda, no adda man, nagsukat laeng dagiti nagan ken lugar. Kas kuna ti maysa a miron, sumalaysu. Ania ti panagkitam, kaka? Dakayon ti manghusgar iti kinapudno ti kapaliiwanmi)

 

Dagiti itta a kameng ti linteg

 

No patien ti maysa a kameng ti sindikato, 14 nga opisial ti polis ti agilaklako iti droga ken adda pakainaiganda iti prostitusion ken maiparparit a sugal.

Saantayon a dakamaten ti nagan dagitoy nangangato nga opisial ngem ti lumlumtuad, no pudno ti impalgak ti impormante, imbes a ti pannakasaluad ti urnos ken talna ti pakaituonan ti imatang dagitoy nga opisial, ti ket agpabpabaknang ti as-asikasuenda, iti pay met aktibidad a maikaniwas iti linteg.

Kitaentayo ti operasionda.

Mamitlo kano a daras iti makabulan a baonenda ti impormante a mapan mangala iti nangato ti gradona a methampetamine hydrochloride, wenno shabu,  iti Transnational Crime building iti uneg ti PNP headquarters iti Camp Crame iti Quezon City.

Makairuar kano ti impormante iti uray 15 kilos a shabu iti inaldaw. Ti makapadakes, aggapu ti droga kadagiti nakumpiska ti Philippine Drug Enforcement Agency kadagiti rinautda a laboratorio ti shabu.

Naiwaras ti droga kadagiti probinsia iti Amianan a Luzon, nangruna kadagiti estudiante kadagiti kolehio ken unibersidad, segun iti impormante.

Kas namnamaen, paglibakan la ketdi dagiti opisial a dinakamat ti impormante nga adda pakainaiganda iti maiparparit a droga.

Ikalinteganda la ketdi a maysa daytoy a panagpiltak a kampania maikontra kadakuada nga adda pakainaiganna iti promosion ti saad wenno pannakaiyalis iti puesto.

Kasta met a salakniban la ketdi dagiti dadduma nga agtuturay dagitoy nga opisial babaen ti panagkunada nga awan ti pannakaammoda iti pannakainbolbarda iti illegal nga aktibidad ken panangsuportada iti kinadalus ken kaawan basolda iti alegasion kontra kadakuada.

Ita pay laeng, mapattapattan nga awan ti pagbanagan daytoy nga impalgak daytoy kameng ti sindikato no ibasar kadagiti napasamak iti kallabes a pannakaibutaktak ti mapapati a dakes nga aramid dagiti opisial a militar ken pulis.

Madakamat ditoy ti kaso a Kuratong Baleleng nga agingga ita awan pay ti nagbanaganna.

Yan ita dagiti nagibulgar iti rub-out, saan ketdi a shoot-out ti napasamak?

Kinuna ti impormante a mapaneknekanna dagiti alegasionna no la ketdi maallukoyna dagiti autoridad a mangipakat iti palab-og nga operasion tapno matiliw dagiti adda pannakaibiangna iti panaglakuan iti droga. Kasta met iti kaadda dagiti dokumento ken saksi a mangpatalged iti kinapudno ti impalgakna.

Ngem ti dakkel a saludsod: agdalikepkep kadi lattan dagiti mapabpabasol nga opisial? Ita pay laeng posible a naggarawen dagiti makinariada tapno makaluban dagiti aramidna – no pudno nga adda pannakainbolbarda iti illegal nga aktibidad.

Nakababbaba ti panagtalek dagiti umili kadagiti polis ken militar, nangruna kadagiti nangangato nga opisial dagitoy kas paneknekan ti naudi a surbey nga insayangkat ti Social Weather Station.

Iti daytoy rimmuar manen a pammabasol kadagiti opisial a polis ad-adda ketdi a dimmakes ti imaheda iti mata dagiti umili.

Pabasolenda ti bagida no apay a dida mapaksiat iti salikubda dagiti itta a mangdaddael iti ladawanda kas salaknib dagiti umili.#

Comments are closed.